106 年全國語文競賽原住民族語朗讀【卡群布農語】 國小學生組 編號 2 號
ihan ludun

ihan ludun miqumic, tingmut min’anoqo tinceqnal la mata’ musu sadu isipal mano’az tu ludun, malqaqalmang nga lukic ihan ludun maldadaqvas malqacivung tiduduldul, maca kaliluvluvun na, muaz kopa kai lisav cin ceqe a vovoqvoq ululuzi’ tusasauc, maqa qau cia ka maszang hitesang kimpi’ a tu malkukundoq ni tu lungu bicukbicuk.

ihan ludun miqumic, pipitpit ta mata sadu vevivevi ka tal’e’an ismut, madia a ni tu mamasazang tu puaq, maszang ngi pintataiv kapupuaq, asa dau, sadu’an tu cimaqa ca mastan mano’azsal ka puaq, maszang puhun tu talbino’az mano’az sadu’an na mahancum sakun, maca kaliluvluvun na, pisno’azno’az za bungu’ pistataqaz mano’az tu daqes cia, kalihahancum pasak ki hancum cia.

ihan ludun miqumic, kilim ata makundoq tu lukic, paloqun istas’i ki imita tu lumaq,matas’i luluman ba’bu’ cin palqanvangan, siza ata lakda’ isqutun min’uni balung lumaq, kilim maqepi tu lakda tuhulun matas’i min’uni ki bistav issu’ia tatavi, siza lakda’ matas’i baning dangi’an pit’ia mahanat pan’e’an, tinlukic mabulcuk tu lukic, ispalusapuz pit’ia qesing makaling sanglav isqul.

ihan ludu miqumic, sadu ata lukic cin ismut, tal’ia kapupuaq mano’az tu puaq, pitesqang pino’az zi sinidu’an mata’, minihan mano’az puaq tu sinidu’an mata’, mapinahip pi is’ang mita miqumic, minihan ata lukic cin ismutun sadu ki puaq minlac mimabulav mimadavuc, siza’un ita min’uni is’iqumic ita han ludun, madia vevivevi tu lac ci lukic cin ismut, maqtu konun ita bunun, heza amin na lac ci lukic cin ismut ta ni tu maqtu konun.

ni ata maqtu uka a ismut cin lukic, altu pa malqaqalmang nga cui su, maca uka cia lukic cin ismut ta lac ca, na ma’aqa ca maqtu balivun ni cui su konun, altupa minkalimuci’ maca ni’in na dalaq tal’e’an lukic cin ismut ta, na maca konun ita bunun han nastu ti.

106 年全國語文競賽原住民族語朗讀【卡群布農語】 國小學生組 編號 2 號
在山裡

在山裡一大早醒來睜開眼睛瞳孔內是青翠山林高緃直立的樹叢一陣風起舞動了綠葉及枝節發出沙沙歌聲但它的枝幹如同站崗的衛兵一樣動也不動的站穩著

在山裡每天眼睛眨一眨看到各式各樣長相各異的植物及花朵爭先恐後的開著展示自已美麗的花瓣就像擦了粉的少女般艶麗並帶著香味微風吹起輕微搖擺漂亮的臉譜肆放出粉味讓空氣充滿花香

在山裡我們找了材質堅硬的樹砍來建造住家及豬舍和牛舍的材料取石材疊成牆壁找個大塊扁平的石頭鑿成石板蓋屋頂拿石頭作為爐灶取乾材來生火煮飯菜

在山裡我們看到植物盛開花朵的過程從眼睛所看的美麗增添了我們活著的樂趣我們也看到植物的花朵漸漸得形成果粒由綠而黄、由綠而紅、由澀而甜我們拿來取用成為我們中山的食物來源好多各式各樣的果實可以食用但也有不可吃的

我們離不開植物就算你有錢而没有植物的果實你的錢可以買什麼吃的呢就算我們錢財萬貫如果我們的土地長不出植物我們能吃什麼食物

文章資訊
文章年度106
文章編號2
文章組別國小
文章語別卡群布農語
族語標題ihan ludun
漢語標題在山裡
文章作者全茂永Atul manqoqo
漢語摘要