106 年全國語文競賽原住民族語朗讀【拉阿魯哇語】 國小學生組 編號 2 號
hlahlatʉngʉa papu’u ahlaina

ahla’amisana, alalalangihlu tatavuhlu’uaka hlahlatʉngʉaisa ka papu’u ahlaina, mavacangʉka tapaʉ tavahlihla, maisanaka tapu’ai miapipihlihli mahluavacavacangʉka hlilʉmʉka, karʉkʉhlʉa papu’u ahlainana uakikirimi ihlahlamu muriturua apaiatuhluhlu hlahlatʉngʉaisa.

maci miungu hlahlatʉngʉa, maisana hlimilavaʉna tapiaili tapiaili matisasangalʉ tapu’ai, makuvaaua papu’u ahlainana: maiatuhluhla hlatʉngikuna! kumitaa ku hlatʉngʉmaipaputu rianʉ pihlivu’u, rahlʉngʉisa rianicutatahlurua, pahlumiamiaisaia apatakuatitipacu ramucu hlamuna.

maiatuhluhlua ku maimahlʉmahlʉngʉ kumita aucaucani rahlʉngʉ, kumita ini italʉvʉngʉka kuli’i hlatʉngʉ, kani’i taiaranaia tumuapacanicani taiaraisaka, macahlia kulihlatʉngʉna kuapautuahlangi ihlaisa apautua rahlʉngʉhlatʉngʉ, amihla papu’u ahlainana:mavacangʉmana vulaihlimu, iniciki tuahlʉ pautuhlangi takuamiaisa hla kana’ana!macuaku taratʉahlʉia, pasakulaiku papapaci, takungahlʉ rumahlaʉ, taiamu’ai matihlimiiungu, maiatuhluhlu hlipasalangʉlangʉa papu’u lʉmʉmʉkʉ hlatʉngʉna, tam puavahlia papu’una ihlahlamu.

kicunguhlu, miaturua papu’u ana, hlimatavararʉsupuhlu sasauvuhluna, amihla:paingururu’ai mavavʉraʉsasauvu hluna!kitasasauvuhluna tataisa hla matatavuhliu, atʉhlʉngʉ angalahlaku sasauvuhlu hliangʉrara ’asarʉ, masasangarʉ mangungururu, pilʉmʉlʉmʉa hlimilavaʉna, makutaisa makuvau “ tam sa’au ” usuanganaiau kucutasʉkʉra mangalaisa kualualucu, mutusasuacu aku papu’una macaca.

papu’una umala tukusu pukua hlatʉngʉ, pakuri vuusu sahlumu maini hla pakurimasaihla, apahlapaʉisa pakurisapasapa, mavacangʉ, tam tuaʉa pukakua hlatʉngʉna, amiaku papu’una putahlamaku pukua, tumatuturua papu’u ihlaku, umaru taumurahla miamʉtʉmʉtʉngusutukusu, arupangʉhlʉvasahlumu kurivusuasahlumu kurikakuahlimilavaʉ, tarauria kana’ana, macacacuka ihlaku, umuhliahlimilavaʉna umalamʉmʉa tukusu pakurivuusu ihlaku, ulavahlamu rianicuamu matarʉngʉrʉ,papu’una macacaca amihla:parucarucakicumu inamu maci puaili salia!

tuahlʉmaru hlahlatʉngʉa papu’u tumalʉlʉvʉ matisangalʉkuli’i. parisasauvuhlu. pukua hlatʉngʉ, tam masasangarʉ, sia’ʉʉra isamana papu’u lʉmʉmʉkʉ hlatʉngʉ pau ihlahlamu, amihla ina’ana, hlatʉngʉisa papu’una paravahlaʉvaʉ hlamataingalʉsa’au.

106 年全國語文競賽原住民族語朗讀【拉阿魯哇語】 國小學生組 編號 2 號
阿嬤的菜園

春天,阿嬤的菜園綠意盎然,阿嬤常找我和弟弟當園丁。一到菜園,弟弟瘋狂抓蝴蝶,阿嬤大叫:「小心我的菜!」每顆高麗菜的葉子都坑坑洞洞,表示我們要大展身手。

我檢查每片葉子,看菜蟲躲在哪?因為菜蟲會把自己當成菜葉的一部份,還好我們眼睛好,我發現就迅速抓起來,總共抓到近百隻!

阿嬤說把紅番茄摘下來,看著大又紅的蕃茄,就想到我最愛吃的蕃茄炒蛋,我摘了好幾顆,突然弟弟說「好好吃喔!」原來他先吃了起來,我和阿嬤都哈哈大笑。

阿嬤拿水管澆菜,水噴的又細又遠,一下又噴散開,我覺得澆菜好有趣,阿嬤教我手按在水管出口,把水一開,一下子水噴到弟弟,弟弟也拿水管噴我,我們最後都成了落湯雞,阿嬤說:「你們回去又要被媽媽罵了!」

在阿嬤的菜園裡幫忙抓蟲、採蕃茄、澆菜,真的很開心,也要謝謝阿嬤都種菜給我們吃,媽媽說阿嬤的菜最健康、最好吃。

文章資訊
文章年度106
文章編號2
文章組別國小
文章語別拉阿魯哇語
族語標題hlahlatʉngʉa papu’u ahlaina
漢語標題阿嬤的菜園
文章作者游仁貴
漢語摘要