106 年全國語文競賽原住民族語朗讀【知本卑南語】 國中學生組 編號 1 號
mazalram ta za tu ika’iyanava kaninta

nu ulra ziya a trau zuwa veraya kaniyam za tu isalem za kulang, za akanen na vuwa’, i nani mu marengay kanazu za “mazalram ku zamu ’inavayan kaniniyam!” nazu na zuwa mateda kana kulang, akanen na vuwa’ nazu na wadadiyanan mukazalram atu semangalan, na yubing nu zuwa mateda za tigami, kinger ku kani nani za marengay za “lrayuan!” tu kuwayaw izu na yubing mu, kemazu misemangalan.

ninta iyavaaw peniya mu, kuazau ta mazalram zatu ika’iyanava kaninta. iniyan za kemazu za nintu kuazawan veray kaninta.

nanta maza’izangan kemay kana makiteng ta, tu vaawaw ta paka’izang, taza pakalrang lra manueman atu ulepan, mazalram mi tu ikalraaman tu ikasahar kininyam na malri za i nani tu asavakan mu mareasavak kana lrevek, tu atrasan mu, mareatras kana zenan.     

kemay kana yociyēng, patari medek kana kuwocung, kanini na muketrep ’amiyan mu, kazuwan na sinsi na pangetrengetr panadam kaninta. tu lrualruwaw ta zatu alrak kemazu maresan lraman mianger kaninta, inta lra mu, kemay kana iniyan taza kinazalram za emaemana, maw na marukezang ta lra zi dalikedik ta zi sayhu ta lra za eman ziya. inta mu, kuazu ta mianger zata sasungalan kana sinsi sakuzuazu a ’ami atu pinatakesiyan kaninta. mazalram ta za tu ika’iyanava kaninta.

kanini na pida ’amiyan mu, mena’u ta kana sinbung mu, kaziua i Siriya na datal mu, matengangetenged zi marevuniyun kiruwaday lra kana tu datar kaziua i Siriya, zi iniyan lra za ruma’ tu kaazuwan. mianger ku mu inta na kazu kani i Taywan mu ’azi ta silrevang zata akanen zata kakavang, zi mutelre’ay ta iyavaaw kemania mu, mazalram ta za tu ika'iyanava kaninta na ta sivu nanta zinekalranan i Taywan.

izu na ’azi ta mazalram zatu ika’iyanava za trau kanintaw mu, maw na uri suvavuli kanantu maza’izangan zi ’azi mareka’inavanava kana trau ziyan, na trau mu kemazu ’azi muai kurekasa kanintaw zi mudawilr kanintaw, nu kemazu intaw mu ’inava ziya maw?

marenger ta kaninta mapiyapiya ulra ta anger za mazalrama ta za tu ika’iyanava na trau kaninta, sasungal ta kanazu na pinulivun pinulralrang mena’u kaninta nazu na kazuwazuwan na ’ata mazalram kanatu ngadan nazu na trau ziya.

106 年全國語文競賽原住民族語朗讀【知本卑南語】 國中學生組 編號 1 號
感恩

每當有人送來他們親自種的蔬果給我們的時候,媽媽總會說「感恩!」送蔬果的親友就會露出愉快的笑容;當郵差送來郵件時我聽到媽媽說「謝謝!」郵差也感到喜悅。

生活裡的一切,其實都需要感恩,沒有多少可以理所當然的。

我們的父母親把我們撫養到大,不知道吃了多少苦,父親要辛苦工作賺錢養我們,媽媽在我們還小的時候為我們把屎把尿。為了照顧我們,她總是最早起來,夜晚最後休息,一天到晚忙不停,如果我們生病,她更是徹夜不眠,只要我們健康快樂父母就感到安慰。直到我們上了國中父母一直都是心甘情願的無怨無悔的關心我們為我們付出。父母的恩情是比海深,比山還高。

從幼稚園、國小一直到國中,這十來年,有好多位老師他們認真地教導我們。老師把我們當成是自己的孩子一樣的關愛著,我們才由什麼都不知道的毛孩子,成了健壯活潑逐漸懂事的小大人。我們要感激老師們這麼多年教育我們的恩惠。

近年來從新聞看到敘利亞這個國家,因為戰亂導致無數的人民顛沛流離,無家可歸。我心裡更是感恩生在這豐衣足食,安定的寶島。缺乏感恩的心,容易背叛父母,不能和人和睦相處,人家也會疏遠他,他還會過得好嗎?希望大家都能以一顆感恩的心,去感謝這一年來替我們服務的許多不知名的人。 

 

 

文章資訊
文章年度106
文章編號1
文章組別國中
文章語別知本卑南語
族語標題mazalram ta za tu ika’iyanava kaninta
漢語標題感恩
文章作者陳金妹
漢語摘要