106 年全國語文競賽原住民族語朗讀【邵語】 國中學生組 編號 3 號
ulalaluan a pulalu sa sunda tu Thau a shashumshum

Thau a taun mashtay ianan sa Thau a ulalaluan, mashtay tu sasazuan a kahiwan a tu tanatuqash kinalawa wa ulalaluan. numa izai thau ya numanuma wa kazakazash, numa sa kalawan, ya mara sa apiq, ya mushaiza faqlhu a taun, ya minpariqaz, ya pulalu apulalu s izahai fafuy a punuq, pishfazaq mita wa tanatuqash, mita wa ulalaluan.

numa malalawa s izai shinshii, mulalulalu a shinshii pulalu s izai fafuy a punuq, pishfazaq mita wa tanatuqash mzai “mara yaku sa apiq, musai yaku faqlhu a taun, minpariqaz yaku thuini a kawash a lus’an…” numa pulalu sa punuq. miazithu tu thau kahiwan izai ya numa wa kazakazash miaqay pishfazaq mita wa tanatuqash.

kanuniza thuini thau mingqtha, mingqthaiza, shashu sa izai tu thau, shashu sa izai tu shpuut, izai az’az shashumshum. ianan izai tu shpuut, izai zain shpuut “kung­ma­pay”, thithu antu sunda tu Thau a shashumshum. maqa thau thuini miasuuniza shpuut, numa sa suma tmash izai shpuut, kmalawa mani izahai shashumshuman a kung­ma­pay, thithu antu sunda tu Thau a shashumshum.

sa sunda tu Thau a shashumshum, izai malalawa sa shinshii mulalulalu mita wa ulalaluan, thithu sa mita wa sunda tu Thau a shashumshum, thithu sa sunda tu sasaz a tu Thau a shashumshum. numa thuini mingqthaiza sa suma, ianan shashu a shashumshum, ianan s izai kung­ma­pay. 

tihauta ya kahiza ya miakuza mingqtha, sa thuini miazithuiza sa Thau mani mashumshum izahai miazai sa tu shpuut a shashumshum, izai shashumshuman a kung­ma­pay. kanuniza ata tu in’aura, ulalaluan a pulalu sa sunda tu Thau a shashumshum.

106 年全國語文競賽原住民族語朗讀【邵語】 國中學生組 編號 3 號
祖靈籃是邵族真正的祭拜對象

邵族的人家每戶都有祖靈籃,每一個祖靈籃都很陳舊,都是以前的祖先編結而成,邵族人進行祭儀禮俗時,如:娶媳婦、遷居新屋、做新年主祭,祭拜時要供出豬頭,會先告訴祖靈籃裡的祖先。

呼請先生媽來拜拜,先生媽以豬頭來供祭祖靈,告訴祖先說:「我娶媳婦我搬新家我今年新年擔任主祭」以前邵族人就是用這種祭拜的方式向祖先禀告重大的行事。

現今已有些改變,但仍有拜拜的儀式。平地漢人「公媽牌(祖先牌位)」,並不是邵族人的禮俗,有些邵族人立起了公媽牌,卻不是邵族的傳統祭儀。

真正的邵族祭儀,是請先生媽來拜我們的祖靈籃,這是邵族真正的祭拜方式,也是邵族舊時的祭拜禮俗。

現在,邵族人拜的是公媽牌。儘管如此,不要忘記祭拜祖靈籃才是邵族真正的禮俗。

文章資訊
文章年度106
文章編號3
文章組別國中
文章語別邵語
族語標題ulalaluan a pulalu sa sunda tu Thau a shashumshum
漢語標題祖靈籃是邵族真正的祭拜對象
文章作者簡史朗
漢語摘要