105 年全國語文競賽原住民族語朗讀【北排灣語】 國中學生組 編號 3 號
likuljav kata kakedriyan

ka sicuayan izuaza matjatjelu a kadjunangan i tailiku, ru tevacaq a likuljav. nuri penasaqetju ta caucau a likuljav, papacun anan ta kina remekutjan nimadju, sa nu inianan a kemeljang ta kinakemudan nimadju, tjara na teqazavanga sun ta su rekutjan, numaitazua tjra uri madjulu tu kapalaken sun nua likuljav.

tucu a qadav, izua macidilj a vavayan kinacu a madrusa aljak a mapana venateq. pakivangavangen anan ita vudavudas aza madrusa aljak, qau ljeteku ta vudavudas sa vateq i ljaviljaving ta pana. aza madrusa aljak ikana mapenetj a sikivangavangan, nutjau djemumulj ta vudas, palamu sa mane kala pitalima, sa palamu kitjuvangavang auta, na maleva aravac tiamadju a kivangavang.

pai tazua manu sevacaq azua nakemasi gadu a likuljav, mingtjus kapacun aza venatevateq a vavayan, ikanga pulingalingav turi pasainu a mavilad, inika kisumavanen anga aljak nimadju, pakirimu a mintuluq matua zaljuzaljum a kiqilja, inika kemeljang anga tu sini qaljud anga kava nimadju. na dremukung i taladj ta zaljum, aminanga za drusa berung na ngudjus tu sinasiyan a mapacucun, sa migeregereger a kinacavacavan nimadju. tazua aza madrusa aljak, kamayan a nakipasavid a kivangavangavang i vudavudas, ika kemeljang tu nakemuda a penalinguljan, saka inika na kinemenem tu ljiadudududutanga tjayamadju a kamakama na sacemel a likuljav, tu paqedeqedevan tjayamadju.

na semamalji uta, aza narumalji nu likuljavan ka pacun taza madrusa kakedriyan, matu nekanu caucau a penalinguljan, ikana kisumavan tu izua likuljav, samalji uta likuljav, ayatua sinitavakananga azua kinaizuanan niamadju, inika sikakudanga nupacun. ikanamaya tua qayaqayam tua sacemel katua caucau, kana pacun katu semequ ta likuljav, matjatjuka mavilavilad a kicacada, kimanu nema aicua madrusa kakedriyan? a maru inikana semanema? cuway a pacucun a likuljav, sa ikana kiqenetj a kintalj aza kakedriyan, kivangavangavang sakamaya tiamadju. qau, kumalji tu celecelen tiamadju ta qulu na likuljav, aza madrusa kakedriyan penumaya a benisbis ta qulu nuazua likuljav, nekangata rekutjan niamadju, sa azua narumalji a likuljav, menekanga a rakacan, matu namasuram sa vaikanga.

aicua tja sipacunan tua kicevungan ta nageminagalj katua napupicul a qalja, nutja marekut itjen tja madjaulj tua ta siselapay, aicua pupicul kata namaqar, katje rakacan katje rekutjan; nu na minseg a su varung, saka nekanu su gagaljan kata lumaljan, maruang zua madrusa kakedriyan a nekangata kininemeneman tua taviqan, siayanga, kumali ki paqedeqedevan na likaljav, inika uri sikakuda.

105 年全國語文競賽原住民族語朗讀【北排灣語】 國中學生組 編號 3 號
老虎和小孩

從前有個地方經常有老虎出沒。老虎總是先放出霸氣,使你還沒看清時已先嚇癱,老虎再來收拾便輕鬆自如。

一天,一個婦女帶著兩個小孩到河邊洗衣服。她在河邊洗衣服,孩子們在沙灘上堆沙塔、用線繩玩翻花。

突然,一隻老虎從山上奔了下來,婦女見狀大驚失色,她顧不上小孩,自己躲進水裡,衣服漂走也不知道。她彎在水中,只留兩個鼻孔在外出氣。那兩個小孩依然在沙灘上玩得起勁,沒注意到老虎在他們附近「虎視眈眈」。

老虎見兩個小孩無視牠的存在,有些吃驚,因為牠所到之處,大家都聞風喪膽、四處逃竄,這兩個小孩竟如此不在乎?老虎用頭去碰他們,兩個小孩隨意地用手撥開虎頭,一點也不害怕,老虎那股兇猛的勁頭沒有了,洩氣地走開。

面對危險或強大的敵人時,越是害怕越會招來災禍,強與弱、威懾與恐懼相依而存;如果你鎮定、無所畏懼,甚至像兩個小孩子心裡根本沒有什麼怕的念頭,老虎的「虎視眈眈」也就成不了氣候。

文章資訊
文章年度105
文章編號3
文章組別國中
文章語別北排灣語
族語標題likuljav kata kakedriyan
漢語標題老虎和小孩
文章作者謝秀珠
漢語摘要