106 年全國語文競賽原住民族語朗讀【卓群布農語】 高中學生組 編號 1 號
Paliciat sapuz

Matu laning’avan ca cikaupa ka dalaq qabas a, madas is sapuz ca madadaingaz musbai munludun, tisciat luvuc a, anaqat mucqu ca sapuz. Vivi’vi ca bunun tu taunahanin ludun daingaz, maupa’i ukain samu sapuz nai. Qaitu sadu kanai tu haiza ca sapuz is ihan vaivi ka ludun tu bunun, maskalun anais qaipic a luqai muna’u makuscaiv is sapuz, minkatudip maizin ca sapuz is Bunun siduq.

Maca Bunun siduq mantan mapisauqbung is sapuz. tingmut mindangkaz mungausang pisdua sapuz, salin tu maizin ca bunun kuzakuza maca ququmbun. Maca sapuz a maqtu ispitdias cikaupa ka nakakaunun, maca makazhav ca diqanin maqtu pisdua sapuz isnuduan, naminangqat ca hubung. 

Maca sinluc’an a sinkukuza, ukma’ia amis sapuz, maupa’i maqtu mapusbais qanitu cin ma’umas madikla a bahi ca sapuz, nani’in ca qanitu lavilavi itun pindikla itun. Maca munludun qanup a, asat pisdua sapuz, maupa’i mapising is sapuz ca tismumuut a mama’az nani’a nai maqtu pikua itun.

Qaitu asa ata bunun tu mananulu ukma’ias sapuz, maupa’i maca sapuz a maqtu pistabas cikaupa ka mama’az cin miniqumic. Mucqa amin ca uvava’az kavivila is sapuz a pistaba lumaq, anaqat asatu mantan mananulu palkaciat sapuz.

Maca sapuz maqtu pincingqal pinangqat. maca madumdum a maqtu pincingqal is na laqaiban ta ka daan.

Vaivivaivin ca sapuz laupata, maqtuin nitu maku’uni lukic pistaba hana mintasal ca sapuz, tupa’un ca maupati tu tingki, haiza amin ca maku’uni kasuling cin simal pintasal is sapuz.

Maca sin’iqumic nita a, nitu maqtu uka’as sapuz, maupa’i maca aminanan a sinkuzakuza cin mama’az a mu’aminin asat ukma’ia sapuz. Anaqat asa ata ka bunun tu makadim macial ukma’ia sapuz.

106 年全國語文競賽原住民族語朗讀【卓群布農語】 高中學生組 編號 1 號
論火能

從前大地上洪水氾濫,先祖們帶著炭火逃向高山上,沒想到炭火在半路上濕掉了,先祖的火種也因而熄滅了。抵達了最高的山上,人們冷得發顫。因為他們沒有火可以取暖。他們看到對面山的人們有火。就商議由紅嘴鳥啣著炭火來,從那時候布農族人才有火了。

布農族非常重視火。工作一開始就先生火,假如煙火升起以後,就知道那裡有人工作了。火可以用來煮飯、燒菜,烤肉等等的食物。假如天氣冷了火可以用來取暖,我們才不至於失溫。

我們布農族的祭典需要火。因為火可以驅除疾病與惡兆,驅趕惡魔,因為牠們怕火。火也可以使野獸心生畏懼,獵人在獵場的時候,必須要升起火來。因為牠們懼怕那熊熊烈火,那些野獸不致於攻擊我們人類了。

可是我們必須謹慎使用這個火,因為火可以燒盡天下所有的東西和生物。小孩們喜歡玩火,由於他們不小心卻引起家裡火災,他們把家裡燒成灰燼。火可以提供我們光與熱,在暗處,我們可以拿火來照亮我們要走的路。

現在的火已經是多樣化了,各有所不同。有的叫做電,它們不需要用木柴燒,而是使用燃油或瓦斯燒。正如也有以光源和熱能的產生。

在我們的生活中,火是不可或缺的能量,因此我們必須節約這火能,才可以永遠擁有火能的力量。

文章資訊
文章年度106
文章編號1
文章組別高中
文章語別卓群布農語
族語標題Paliciat sapuz
漢語標題論火能
文章作者黎沐恩・腦帆
漢語摘要