105 年全國語文競賽原住民族語朗讀【卡群布農語】 國中學生組 編號 2 號
Biung sinap pi luhum

Heza qabasang pakadedaz tu pakatuszang, heza nai tatini’ uva’az, patinganan tu Biung, pakahanun qudasnanaz za ngan, maqa bunun patingan na pakahanun tastulumaq tu madadengaz za ngan nih uvava’az, ni tu qalmang.

Taldaingin na Biung nga malmanaun maqacibang sala, uka bunun lavai cia maca patindangkul, maszang tas’acikis maqazebung. Kuniv va Biung tupa tu, uka duma sika zaku mataliskang, opa zaku ka malmananun maqazebung tu bunun han dalaq nastu ti.

Heza tastuqani’an tindadangkul la Biung, han mabukzav tu dalaq, heza luhum ihan tanangaus cia, tupaka Biung tu, malmananu cak mataliskang, makuaqa luhum tuna han ngaus nak? Ni a is’ang cia masidu’, luklacan cia ka luhum tu, luhum tanam ata pintataiv, sadu ci cimaqa ata mastan maqacibang.

Tudipin na tanamin nai pintatav va, tupa ka Biung tu, ios! Na lave’a ku asu. Kitnga’in na, mungangaus sa Biung. Qaqtung naip papia tu madadengaz, tupa’un nai tu, Biung malkama’qa asu? Antalam ma Biung tupa tu, tanam cak pintataiv vi luhum patindangkul! Qenanan ni madadengaz tupa tu, na maqtuqa asu lavai’ i luhum, katu qalmangqalmang minanual miliskin. Antalamun Biung tu, maqtu cak lavai i malmananu cak maqacibang.

Tindadangkul naip sopa mabukzav samangqa sadu, halaca sal ka luhum, mangihit naip maqenan tupa tu, macak qalmang lave’an, lavai tupa cak, matu tinngihit naip pa aikia! Tiskapat ti lakda, ai… anana do.

Kilau naip tu cia luhum ma padangi lakda patiskapat, mapapaspas si dalaq han qa a tupa tu, ni tu makua, nanu’ cak maqacibang.

Tongquvalikin samangqa a Biung sadu diqanin, ai tupi halaca ku ka luhumun, makuacuna iska hanin tanangaus nak ki? Macunoq qa Biung luklac tu, luhum! Qalang cak lave’an su lopaku, na lavai tupa cak su'u unisin!

Sisinap pa Biung luhum, samamangqa sadu’ dungzavin sihalacan, altupa makua sisinap pa, ni tupa usinapan, tupa naip tu, macak ni tu usinapan nit, zaku ka malmananu maqacibang tu bunun! Macalpu naip islongqo han nastu ngalaqngalaq tatangic tupa tu, macak ni tu usinapan? Macak lave’an nit? Zaku ka malmananu maqacibang tu bunun!

Tudipin naip maqanciap tu, heza qana mita bunun na pac’upan nih tamasaz, ni tu kas’ang tu matamasaz mateklac, ni tu ciaki cimaqa lavai cimaqa lave’an, ma’ata nastu dalaq ti miqumic ca asa tu heza’an madungdung tu is’ang.

105 年全國語文競賽原住民族語朗讀【卡群布農語】 國中學生組 編號 2 號
追白雲的小Biung

有個小孩叫Biung

Biung在部落裡跑步最快,連動物都無法在他的面前順利逃脫。Biung認為,他是世界上最會跑步的人。

有天Biung發現一個白雲永遠跑在他的前面,他越想越不甘心,便對白雲挑戰。

終於到了比賽的日子,不管如何拼命的追拼命的跑,都會發現白雲領先,不管再怎麼追也追上。

他終於知道,每人都有極限,不要自以為聰明有能力,重點不是誰贏誰輸,人在自然面前應該謙卑。

 

文章資訊
文章年度105
文章編號2
文章組別國中
文章語別卡群布農語
族語標題Biung sinap pi luhum
漢語標題追白雲的小Biung
文章作者全茂永Atul
漢語摘要