107 年全國語文競賽原住民族語朗讀【建和卑南語】 國小學生組 編號 2 號
vurasi

salaw ku sahar mekan da vurasi nu demaderu di nu ma’avay da kinaveras i nani mu, tu ’uriyay da vurasi. salaw imaran nu mekan ku. nu cemaulr ku da menaniwan na kinerang na vurasi mu, payas ku cemima’ mekan.

marekamelrimelri na vurasi harem. ulra na dangdarang; na maruru’; na vulreci’. na ngarus; na ’angevu.

adaman duwa i mulri na ma’inay kaniyam mudangiya. penauwa kare’a’alri mi. “ mumu mekana ta! ” kema ku kantaw. mukuwa ku melaka da kaysing di ’aracip. ku patariyaw da maderu i mulri. ku pakacasanay da duwaya da vurasi kantu maderu. madiyadi di tu na’una’uway tu kaysing di kiyumalr “ uniyan mu da vulas? ” kema kiyumalr kani nani. madakedak i nani. “ ama kumuda diyamaw? ” “ adi ku sahar mekan da vurasi ” kema temuvang i mulri. tu payasaw ’emaracip na vurasi puwa kanangku kaising i nani.

venavati lra i mulri. “ a makiteng ku diya mu, salaw mi kalramalraman. uniyan mi da paysu cemima’ da vulas. nu piya kemangkang datuvurasi na cau mu, pulikudan mi maduk kana musama’ na vurasi. niyam savesavay di deruwaw mekan. na musama’ mu, niyam sariyaw pakadaw di apecaw. nu uniyam mi da akanan mu, mekan mi kana pinakadaw na vurasi masenga ta lra mu, semaseker mi remamed. harem nu mena’u ku diya da dineru a vurasi mu, payas ku paranger daku kinamakitengan ” kema.

salaw ku mianger kantu vinavatiyan kani mulri. harem mu, kalra’ayan ta lra inuwavaawan i punapunan di. nu maranger ta mekan da eman mu, tu payasanay ta cemima data ma’a’idangan. sadu ta akanan harem. nu eman mu, adi ta lraaman da akanan. salaw kuwaceng ini na kakuwayanan. kemay harem lra mu, ta lramanaw na akanan, ata mipapela’ remaranak da eman diya.

107 年全國語文競賽原住民族語朗讀【建和卑南語】 國小學生組 編號 2 號
地瓜

我喜歡吃地瓜,媽媽煮飯時飯裡頭有地瓜,蒸糯米飯時就加上搓過的地瓜。只要聞到有烤地瓜味時,不管它在哪兒,我一定去找並買來吃。

現在的地瓜有很多種,有紅的、有黃的、有白的;有脆脆的、有酥鬆的,我最愛吃酥鬆的。

昨天舅公到家裡,我們在吃中餐,我打招呼:「mumu,吃飯!」便去拿碗筷,裝飯並加兩塊地瓜端給舅公,舅公不動筷子,靜靜地看著他的碗,遲遲才問:「你們家沒有米嗎?」媽媽愣了一下,接著問:「舅舅,怎麼了?」舅公說「我不喜歡吃地瓜。」媽媽趕緊把地瓜夾到我的碗裡。

舅公說:「我小時候家境很清苦,沒錢買米。別人犁完地瓜田時,我們撿拾掉落的地瓜。剩下的地瓜,用搓刀搓成細細的,曬乾後收藏。沒食物時,我們就吃乾地瓜,吃膩了還是勉強吞下。現在每次看到地瓜,我都會想起小時候。」

聽完舅公的故事,我心裡感觸特別多。現在我們生活在豐衣足食的環境裡,我們應該更加惜物,別做無謂的浪費。

文章資訊
文章年度107
文章編號2
文章組別國小
文章語別建和卑南語
族語標題vurasi
漢語標題地瓜
文章作者洪渟嵐
漢語摘要