105 年全國語文競賽原住民族語朗讀【建和卑南語】 高中學生組 編號 1 號
mudawilr mukuwa mudadangiya

“ inta na cau palru kana minacay, adi ta diya pakalrang mudawilr mudadangi mu, nanta ikavavaaw, iniyan da cima’. ” kema marengay na cau.

mudawilr ta mukuwa mudadangiya, pakasaadu data inana’u data kiningeran.

na udadangiyan mu, maruwa ta kadu i Taiwan, di maruwa ta mudawilr kana duma na kanatal mudadangiya.

nu kadu ta i Taiwan mu, ulra na cau mipaliding kana haiya mukuwa mudadangiya, ulra na cau miotobay di na didinsiya mukuwa mudangidangiya.

na ma’idang lra tu ’ami na cau mu, marayas kurelrang kana yulanbas mudadangiya. kadu ta i Taiwan mu, maruwa ta miturus kananta anger mukuwa kananta auwayan mena’una’u.

sadu kanta i makadekadekalr na kinuwakuwa mingadan na kivangavangan, di nantu vinilin na kinaawacanan na eman diya. na vulavulayan kana yulanbas mu, sayhu marengay kana sadu lra tu inlrangan tu kinadalram, tu pakadalramay ta da inuwayan diya datu piningadan kanidu na dekalr, di nani mu uniyan diya i valray da ta tinakesiyan, di tu pinakapadangal lra di tu akanen na vuwa’ lra. maresayhu marengay kana sinsi na pananadam kana pinidare’an di kana kakuwayan na kinawacanan.

nu mudadangi ta i Taiwan mu, salaw ta kalra’ayan, paraduk ta saeman da paysu mu, karuwa ta lra muiyan. aymu, ’inava nu milralrang ta kararuwa ta marepana’una’u.

kanini na pida ’ami mu, i Tayliyok di i Taiwan mu, karuwa ta lra karamukuwa kivangavanga. kana wariwari diya mu, kaduwan lra na cau karamukuwa i Tayliyok di duwa kanta i Taiwan, pakamaresemak lra ini na udadangiyan diya na kiyakarunan, kani makadekalr diya mu, ulra tu kirkamelriyan. na akanen lra, na pinikavangan lra na kaaduwan lra di na pakakawangan lra, na kasemaangalan lra mu, ulra nantu kirekamelrimelri iyan diya. adi ta parepakuwakuwa da ta ikavavaawan, kitulud ta kantu kakuwayanan. ta aya’aw melak idu nantu ’inavayan di ta asalraw ta ’ulidan paka’inavaya ta. kuwaceng nu kipayapaya’ ta da kimatengedan, pakanaana da cau diya.

nu mukuwa ta mudadangiya kana salaw musalrahaw di salaw munganguwayan na kanatal mu, kamawan da mukuwa ta i lukup, nu mukuwa ta kanidu na matengetenged mu, kamawan da mukuwa ta kana ’aremeremeng kakaukaud.

madalram ta lra da padangalan a salrahawan.

na misaharan diya mudawilr kana duma na kanatal na cau mu, adikaadi ulra tu ipaladuk da ’a’iyar, nu uri yaawa ta pungaway ta diya kipuvalraya. ta kaace’alraw ta adain. minada ta da dalikedikan, semangalan di kipatunun ta kananta rinuma’enan. di nu mukuwa ta lra mudadangiya mu, nu mena’u ta kana vulay na inudawayan ta sasingaw ta vavalrayay. nu ulra diya ta sama’ paysu mu, cemima’ ta da pakasemangal da rinuma’enan. kana adi maresaresan tu kakuwayanan a kanatal, miirayan ta mikaudan ta datu kuret, ata pasasalaw lra marengay.

nu ulra nu paysu di ulra nu wari nu aidan mu, karuwa u kemuret danu awayan mudadangidangi. ini na wadadangiyan mu, kamawan da takakesiyan. semalra nu temakesi ta i rakad mu, nu pulaludus ta tinakakesiyan mu, mukuwa ta diya mudadangiya parasan.

“ nu temakesikesi ta lra da sadu na valray mu, adi kamawan nu padawilr ta da inlrangan a dalan. ” kema tu pauwayan...

105 年全國語文競賽原住民族語朗讀【建和卑南語】 高中學生組 編號 1 號
旅行

一個人終其一生如果都沒出去旅行過,人們會說他活得沒有價值。旅行使人增加見聞,開闊視野。

旅行可以在國內旅遊,也可以出國旅行。

在國內有人自己開車去旅行,有人騎機車或騎單車旅行。年紀大的人跟著團做遊覽車旅行是很普遍的方式。在國內自由行可以到自己嚮往的地方走走看看,國內有許多各縣市的名勝地和古蹟,遊覽車的小姐很多是經驗豐富的解說員,她們會介紹一些我們在書裡沒讀過的地名由來,各地的特產,比史地老師說得還清楚。在國內旅遊很方便,只要準備一些錢就可以成行,但最好有同伴可以互相照應。

這幾年兩岸開放,台灣和大陸兩地每天都有很多旅人往來,使觀光的事業蓬勃起來,每個地方不管在食、衣、住、行、育、樂各方面都會有它的特色,我們不宜拿它和自己生活的地方做比較,而要接納了解他們的生活方式,吸取他們的優點來改進自己。希望好戰者不要挑起戰火,給人們帶來苦難。

出國旅行到和平先進的國家猶如到了天堂;到戰事頻仍的地方會覺得來到地獄一樣。我們就會覺得和平的可貴。可要是到了戰爭的國家,也會感到自身難保,隨時會有危難發生。

喜歡出國旅行的人,旅行前一定會積存足夠的旅遊費用,出國要先辦好出入境的事宜。旅行的裝備以輕便為主。帶著健康的身體、愉快的心情和家人道別出門。旅行時擷取好的畫面或紀錄難忘的事情。如果有餘錢還可為親友帶些紀念品,要記住各國的國情不同,有些國家避諱說什麼或做什麼,我們要尊重不可逾越。

當你有錢又有閒的時候可以計劃去旅行。旅行也是教育,所以高中生畢業前學校會辦一次畢業旅行,可應證所謂「讀萬卷書,不如行萬里路。」的道理。

文章資訊
文章年度105
文章編號1
文章組別高中
文章語別建和卑南語
族語標題mudawilr mukuwa mudadangiya
漢語標題旅行
文章作者洪渟嵐
漢語摘要