105 年全國語文競賽原住民族語朗讀【南王卑南語】 國小學生組 編號 3 號
talaulepan temakesi

“ drering...! drering...! ” kema maruni na pararunian. a katalaulepan lra dra sinsi aw dra temakakesi garem. kemay i takakesian mupatraran na temakakesi. salaw buriawan.

kadri takakesian i, ulraya na maekan driya dratu kenamayan. alra puwari mekan a semaluwan i! ulraya na meladaladam semenay dra temarapuyuma lra, dra temaramingkuk lra. ulraya na tematililr dratu tatatililran. alra adri tu pasekadri tu tatililran adaman i! ulraya na maaip dra batibatiyan. ulraya na trematrekel dra enay.

kadri baybay i, ulraya na mauka mayaa kantu wadi. alra ulraya tu taturuwan dra ngai i! ulraya na mauka kiputremela. alra ulraya tu nanayan isuwa i! ulraya na marepalrulruy. patrepa dratu pinauwanaw kana sinsi. aw tu kadrekiyaw. ulraya na mateang. alra kemiyaanger dra manay driya i! ulraya na melraselras marengay. alra amau na adri maranger pakilrengaw dra trau i! ulraya na maagelr muka i puwatraiyan. 

kadri renarenadran i, ulraya na malalinay dra mali. maaraaraw kana mali. mudirus dratu marelradek! ulraya na malalinay dratu kalalinayan i takesian. na kalalinayan i takesian i, esadru aw marekamenimeni. ulraya na mukulukulung kadri tralutralunan. miyatralun lra tu kiruwan.

 

an garemaremay i, kilrengaw ta dra kemesikesik. an garemaremay i, kilrengaw ta dra emuiuy. an garemaremay i, kilrengaw ta dra saaeru. saliyakesikan aw semamangalan na temakakesi. 

kuyku i, marenang mi kan ngidralri. muka mi menauwa dra naniyam sinaleman kadri takakesian i likudran. ulraya a kulang, a kadumu, a bunga. bitrebitraw na tralun na temelriyu; drimutraw na maekan kana kulang na uled; na tralrebek i niyam lratudray. an numa dar i, muka mi menauwa dra aputr. sadru na mubaba na aputr. salaw bulay aw ulringulr.

“ drering...! drering...! ” kema maruni na pararunian. “ asuwasuwa mulipas idri na muketrep trektrek na katalaulepan ” kema na temakakesi. na kadru driya isuwasuwa na temakakesi i, garusegusan pabekas muka tremepaya dratu takakesian temakesia!

105 年全國語文競賽原住民族語朗讀【南王卑南語】 國小學生組 編號 3 號
下課

「鈴鈴鈴…!鈴鈴鈴…!」鈴聲響了!是下課時間,學生從教室衝出來,很熱鬧耶!

此時,教室裡有人在吃早餐,也許是早上來不及吃吧!有人在學唱族語歌、學唱中文歌,有人在寫作業,或許是昨天的家庭作業未完成吧!有人在唸故事書,有人在喝水。

走廊上,有人去找弟弟妹妹,可能有事要交代吧!有人往醫務室去,大概有病痛吧!有人在追逐,正好被老師碰上而挨罵!有人在發呆,也許有心事吧!有人在說悄悄話,可能是不想讓別人聽到他們的談話內容吧!有人匆匆地要去上廁所。

運動場上,有人玩球,搶來搶去,哇!流了滿身汗。有人玩遊戲器材,學校的遊戲器材有很多項。有人在草皮上翻滾,弄得滿身是草。

一下下聽到尖叫聲,一下下聽到呼喊聲,一下下聽到笑聲,學生活潑、高興與快樂。

我嘛!和好朋友到教室後面,看看我們種植的青菜、玉米、地瓜。拔除長出來的草;捕捉吃青菜的蟲;長得密集的地方就間拔。有時候,我們會去看花,花開了又香又好看呢!

「鈴鈴鈴…!鈴鈴鈴…!」鈴聲響了!是上課時間。「十分鐘的下課時間,怎麼過得這麼快啊!」學生說,不論在任何角落的學生,都紛紛地奔向自己的教室,上課去囉!

文章資訊
文章年度105
文章編號3
文章組別國小
文章語別南王卑南語
族語標題talaulepan temakesi
漢語標題下課
文章作者鄭玉妹
漢語摘要