104 年全國語文競賽原住民族語朗讀【南王卑南語】 國小學生組 編號 2 號
bunga

salaw ku sagar mekan dra bunga. an maresiyuk i nanalri dar i, tu uriyay dra bunga. an temataur dra bineraberas i, tu uriyay dra sinariyan dra bunga. salaw imaran an mekan ku. an tremaulr ku driya dratu bali kana bunga na trinebelran. alra ulraya isuwa i, ku ayaaw dar aw tremima ku mekan.

marekamenimeni na bunga garem. ulraya na midrarang, ulraya na milanang, ulraya na bulenan. ulraya na ngarus, ulraya na angebu. maraimaramaran na angebu.

adaman i, druwa i mulri na mainayan kaniyam muwadrangiya. patrepa dra kareaalri mi. “ mumu mekana ta! ” kema ku emauaw. muka ku malaka dra kaising aw dra tratringal. ku lrawaanay dra tinalrek i mulri. aw ku pakasatray dra druwaya dra bunga kana tinalrek. madranga aw tu seeranaytu kaising kan mulri na mainayan. “ uniyan mu dra beras? ” kema kiyumalr kan nanalri. magerareger i nanalri. “ ama, makuda amaw? ” “ adri ku sagar mekan dra bunga ” kema temubang i mulri na mainayan. tu payasaw ematringal na bunga kan nanalri. aw tu retraanay kanku kaising.

patawar lra benabati i mulri na mainayan. “ a makiteng ku driya. salaw mi kalramalraman. uniyan mi dra paisu tremima dra beras. an peniya kemangkang dratu bunga na trau i, pakalikudran mi muka melusilra dra bunga. sabesabay aw deruwaw mekan. na musama i, sariyaw pakadawanay aw apetraw. an uniyam mi dra akanan i, niyam resiyukaw na pinakadawan na bunga mekan. masenga mi lra kemuda i, pasiesiay melaus. garem i, an menau ku driya dra bunga i, payas ku pakiyanger draku kinamakitengan. ”

salaw ku sadru kemiyanger kantu binabatiyan kan mulri na mainayan. garem i, iyanabayan lra ta inubaawan i punapunan. an maranger ta mekan dra manay i, payas muka tremima ta maaidrangan. salaw kalruba a akanan garem. an numa i, adri ta simei na akanan. salaw kuwatis idri na kakuwayanan. kemiramiya ta garem ta simeaw a akanan. adriya ta meranaranak dra manay driya.

104 年全國語文競賽原住民族語朗讀【南王卑南語】 國小學生組 編號 2 號
地瓜

我喜歡吃地瓜,媽媽煮飯時飯裡頭有地瓜,蒸糯米飯時就加上搓過的地瓜。只要聞到有烤地瓜味時,不管它在哪兒,我一定去找並買來吃。

現在的地瓜有很多種,有紅的、有黃的、有白的;有脆脆的、有酥鬆的,我最愛吃酥鬆的。

昨天舅公到家裡,我們在吃中餐,我打招呼:「mumu,吃飯!」便去拿碗筷,裝飯並加兩塊地瓜端給舅公,舅公不動筷子,靜靜地看著他的碗,遲遲才問:「你們家沒有米嗎?」媽媽愣了一下,接著問:「舅舅,怎麼了?」舅公說「我不喜歡吃地瓜。」媽媽趕緊把地瓜夾到我的碗裡。

舅公說:「我小時候家境很清苦,沒錢買米。別人犁完地瓜田時,我們撿拾掉落的地瓜。剩下的地瓜,用搓刀搓成細細的,曬乾後收藏。沒食物時,我們就吃乾地瓜,吃膩了還是勉強吞下。現在每次看到地瓜,我都會想起小時候。」

聽完舅公的故事,我心裡感觸特別多。現在我們生活在豐衣足食的環境裡,我們應該更加惜物,別做無謂的浪費。

文章資訊
文章年度104
文章編號2
文章組別國小
文章語別南王卑南語
族語標題bunga
漢語標題地瓜
文章作者鄭玉妹
漢語摘要