106 年全國語文競賽原住民族語朗讀【都達語】 高中學生組 編號 1 號
Kari tnhriqan alang nSediq Balay

Ita sun Seediq nii u turu ta dndulan kari, kiya sun ta Sediq nToda, Sejiq nTruku mi Seediq nTgdaya. Mnniq ta quri pusu yayung Mtudu quri Paran hiya mi dhoq alang Truku. Brah ini ta na yahi qmlahang Tanah Tunux ciida u, ya bay mpdhoq 100 alang hnyuwan ta turu dndulan kari Sediq, uxay uri u ya bay phrinas. Ana naq ini pntna hari ka hngak kari ta u, mgkla ta kari mi mngaangal ta kari do mpprngaw ta uri. Balay bay niqan ka ini pntna pusu kari ta uri, ana sow kiya, mssiling ta do klaun ta da.

Slaqi ku ciida u, sow nii ka kari bnhangan mu rudan alang, enca “ Niqan dadan ta way mniq quri alang Tlwaun ha ” enca mi, sow kari na mptpatas Taiwang hini saya u, ya bay brah kngkawas 400 dhoq 500 cbiyaw pa, mnkdalax alang ta hini musa thdil quri hiya ka drudan ta cbiyaw enca. Lmnglung ta ka kari daha nii do, ya bay wada sow kiya enca ku naq lmnglung ka yaku uri, wana qnbsiyaq diyax tnhriqan daha nii ta ini klai bbay, ado ta ka uka patas ka ita, kiya ka nii ta asi pndungus kari daha ka ita saya da. Bsiyaq balay ka pnswayan ta da, maku ta mspayis ka babaw na uri da, cnduray hari dungan u, wada ta mngaangal hangan sun Truku daha Sediq da, kiya ka sow hari wada uka ka lntulan ta mi pntswayi ta da. Ana Plmukan daha Tlu nii pa, psun na qmita ka Truku daha Sediq saya, balay bay u kingal ta pusu nrudan ka ita.

Kndadah ka yahan ta na qmlahang Tanah Tunux do, ya ado kmciyuk qqlahang Tanah Tunux ka drudan ta, ana naq pusu alang ta hini, ana naq tnhriqan daha alang Tlwaun, thrigun thrigun na ka alang nnniqan rdrudan ta, kiya ka dhuq yahan ta na rmiyux qmlahang Tlu nii da, wada ta sow saya ka niqun ta laalang Sediq da. Saya do, ini prngawi ka sediq way mangal hangan sun nTruku u, uxay wana pusu alang ta hini way ta niqun ita Sediq, quri alang Tlwaun mi quri alang Girang, niqan alang ta ita nSediq uri, spuun kana do ya bay mpniqan 20 hari alang dungan. Ana sa quri Tlwaun hiya u way trimax mniq alang sediq Truku daha Amizoku, quri Girang hiya u way msupu mniq alang Tayan, kiya ka laqi daha do, way ini kla sa tnSediq ka pusu rudan dhiya da.

Ini pntna ka ziday saya da, laqi saya u kndalah laqi ciping ppuuyas, kiya ka mkla alang Plmukan musa muyas, dhoq kawcong duma mi dhoq daigako ka duma, mhdu muyas dmi miing qqpahun daha da, egu balay ka risaw mi wowa ta nSediq way qmpah alang Plmukan. Sow nii do kndudun egu ka wowa ta musa snaw risaw Plmukan, Tlu mi sediq kaalang icin, risaw ta uri u mangal qridil iicin uri, ado lmnglung qpahun daha, kiya asi naq trimax mniq alang Plmukan ka duma da. Ana naq ini pskingal alang ka dhiya nii, saya do hbarw bay ka ita nSediq ga trrimax mniq laalang Plmukan.

106 年全國語文競賽原住民族語朗讀【都達語】 高中學生組 編號 1 號
賽德克族部落的遷徙

賽德克族包含都達、德路固、及德固達雅群,原居於濁水溪上游、今霧社至靜觀一帶,在日本人還沒來之前,三語群所建立的部落接近一百個。彼此在聲調、詞彙上有部分不同,仍可以溝通。

耆老說:「我們有親戚居住在花蓮地區」,約四、五百年前,祖先由南投往花蓮地區遷徙。近年來,太魯閣族和賽德克族已分別正名。

日本時代,祖居地(南投)、移居地(花蓮)不斷迫遷,直至今日,賽德克族分布就如現今的狀況。賽德克族不僅居住在祖居地,花蓮、宜蘭地區也有部落,加總或許還有二十個部落。

居住在花蓮的族人與太魯閣族、阿美族混居;居住在宜蘭的族人則與泰雅族混居,他們的子女已不知道祖先是賽德克族了。

現代的小孩自幼就得讀書,四處遊學於漢人的社會。現今,很多賽德克青年就職於漢人社會。

很多賽德克女子嫁給漢人或其他原住民,賽德克男子也迎娶不同族群的女子。由於就學、工作、嫁娶問題,台灣人大多是混居的現象。

文章資訊
文章年度106
文章編號1
文章組別高中
文章語別都達語
族語標題Kari tnhriqan alang nSediq Balay
漢語標題賽德克族部落的遷徙
文章作者伊萬納威
漢語摘要