107 年全國語文競賽原住民族語朗讀【都達語】 國中學生組 編號 2 號
Kdikic mi laqi tama bukung

Kari pnsltudan nii u, niqan daha laqi mntna balay qtan sa, kingal u laqi Hnli mspac llutuc na kiya, hangal na u Aythuwa, mi kingal laqi sa u, mniq alang mqrinuc mi sbtan knttu tama na kiya sa, hangal na u Tanmu. Txal sa, musa mpulah nganguc ka Aytahuwa nii, pkluy Tanmu, asi sdangi, egu bay kari prngawan daha, mi maku bay ppsura kndusan daha, kiya wada ppriyuh mlukus lukus daha. Ini bay klai sa, kiya bay wada ruma sapah paru ka Tanmu do naqah miyah nganguc da; kiya ka Aytahuwa u muriq bay qduriq naqah tama na kiya. Ini daha bay snhyi lutuc bukung ka Aytahuwa nii da, cyahan daha mi sbtan daha.

Kiya ka daan qrapan bukung kiokay ka Yeysu ciida, cyahan qmlahang ka hiyan, mi smbuc hiyan, mi mukan na doriq na, slingan na sa, “ Sediq su pklaman, rngawi nami ima nii smbuc isu? ” inlamu ka pscyahan daha hiyan. Mntna hari sow nii knrmun lnlungan na ka Aytahuwa nii, ini daha snhyi sa laqi bukung ka hiyan. Ya kiya nii daha muri pusa mkdikic mi mowi, mi btan daha mi sngan daha, ini balay sow pkluy endaan sow nii ka hiyan, ado ini daha snhyi sa laqi tama bukung ka hiyan, uxay Tanmu. Niq sediq qnraq Yeysu ha ciida, ngalan daha qnaqh bay sediq ka hiyan uri, cmeyyah utux tama baraw ka hiyan. Kiya ka ana manu miyah ptraqil hiyan. Ini balay snhyi sa niqan sow nii naqah balay oda ka babaw dhran nii, ana Yeysu, laqi utux tama baraw, nii muda qnaqah bay endaan sediq dhran ka hiyan.

Rmngaw ka Yeysu sa, “ Kndadah saya, tlung ku narac utux tama baraw ” klaan naq sediq Yuta ka kari nii, kiya naqah daha balay qmbahang ka kari sow nii, manu niqan sediq sow nii rmngaw hiyan nanaq sa yaku Misaya? smiling dungan sa, “ Kiya , ya su laqi utux tama baraw ka isu? cmiyuk kari Sila ka Yeysu, ” iq sa. Kiya nii ka paru bay hangan cumi na, ado rmngaw hiyan nanaq sa laqi utux tama baraw ka hiyan. Enbay sow laqi tama bukung ka hiyan ini daha snhyi. Utux tama baraw, ado balay bay, wada daha ngalan ka kndusan na da. Kiya smiling balay ka sediq sa, nasi sow pkluy pqnah kndusa oda ciida do, ya ta malu mqbling sediqhug? klaun ta ananaq mhuqil ini bay qbling ka Yeysu.

Ita, ya pkmalu knan ka endaan na? uka balay dungus na. Binaw paru bay ririh na miyah umalu tnan. Kiya sa nii ka paru bay unalu tnan utux tama baraw. Ana ima nii ta na pkburuh lnglungan tnan, mudus dhran hini manu ka dungus na balay.

107 年全國語文競賽原住民族語朗讀【都達語】 國中學生組 編號 2 號
乞丐與王子

有兩個長得一模一樣的小男孩,一個是亨利八世的兒子愛德華;另一個是住在貧民區,經常受父親虐待的湯姆。一次愛德華跑到宮外,碰上湯姆,兩人很羨慕彼此的生活,決定交換衣服。不料,湯姆一回宮就出不來了;而愛德華拚命想逃離湯姆父親的魔掌。此時的愛德華,沒有人相信他是王子,反而侮辱他,欺凌他。

當耶穌被捉到大祭司那時,看守的人戲弄他、打他、辱罵祂時,就像那些不相信愛德華是王子的人,逼他去乞食。耶穌也被誤認為是罪人。

耶穌說:「從今以後,人子要坐在神權能的右邊。」他們更加無法忍受,人怎能自稱為彌賽亞?他們再問:「你是神的兒子嗎?」耶穌回答「是的」。這就是耶穌的罪名,因為祂自稱是神的兒子。正如愛德華是王子,但在貧民窟裡沒有人相信。

耶穌因為誠實,犧牲了祂的性命。

 

文章資訊
文章年度107
文章編號2
文章組別國中
文章語別都達語
族語標題Kdikic mi laqi tama bukung
漢語標題乞丐與王子
文章作者伊萬納威
漢語摘要