105 年全國語文競賽原住民族語朗讀【都達語】 國小學生組 編號 1 號
Daping qaqay tama rudan

Tama mu rudan smkuxul musa tmsamac lmiqu mi murux mniq beywi qnpahan, ini hari eniq alang, kiya mi ini mu qtai hari alang ka hiya. Txal tama mu mi bubu mu dsan ku daha beywi qnpahan qmita tama rudan, pklu bay rbawan ka ciida ini usa tmsamac lmiqu, kiya mi madas nami siyang babuy sadas nami tama rudan, yasa smkuxul bay mkan wawa ka tama mu rudan.

Dhoq nami beywi qnpahan do rwahan nami ka rhngun, kla mntahu puniq mi nisu mhlaw pala pungu mtaqi ka tama mu rudan. Ciida hana mu tgkingal mita doriq mu o kiya ka “ Daha paru qapan qaqay ” na, wada ku mskluy bay qmita daha kndux mi paru qapan qaqay tama rudan mu ka ciida. Kiya mi Tmalang ku musa siyaw tqiyan tama mu rudan, ttuyun mu “ Tama rudan! Tama rudan! Nii nami miyah qmita sunan ”, tbiyax ku smiling hyaan “ Malux kndux mi paru bay ka qapan qaqay su hug? ”

Mtutuy mi mqaras bay qmita mnan ka tama mu rudan, ddiyun ku na bawa dsun ku na tluung siyaw puniq, muduh nami siyang babuy mi rmngaw knan sa “ Ini ku kdapil kndadah laqi ciping ka tama rudan, kiya mi sow nii kndxan mi knparu na ka qapan mu qaqay! ” smiling ku dungan ka yaku “ Masu ini usa mari ramil hug? ” “ Uka mbari ramil ka cuxal, kiya mi ini kramil kana ka tnhiqan mu. Saya ririh saw ramil ka qapan mu qaqay da, nasi ku mramil do ini ku kla mksa da, ananaq sow nii ka qaqay mu da! ” enca cmiyuk ka tama rudan.

“ Rngawi misu ha! Sow ku isu laqi cbiyaw u ini ku kkiicu ana manu, ana inu qulung niqan daping qaqay mu kana, sow bay ppngrah karac, wasaw qhuni knegu na spuan. Diyan cmbu kcka ka hidaw u, musa ku mkaraw pusu qhuni sow ku bay rungay hdoday, babaw pusu qhuni egu bay hntiyan mu daping qaqay. Keman rmdax babaw karac ka idas u, musa ku snul tama mu tmsamac lmiqu, mbiyax ku bay mhraw pada, rapic mi boyak dnii…, kiya mi llmiqu egu bay hntiyan mu daping qaqay uri. Klelu saan tmukuy macu qnpahan u, mmksa, tmalang ku musa mi miyah kddiyax, rmabang wada egu bay ka hntiyan mu daping qaqay hiya. ”

Qmbahang ku snru tama mu rudan do mkla ku da, cbiyaw balay han o uka ka ramil ssapic na qaqay, ana mksa, ana sbotow, ana tmalang babaw dhran, spriq mi btunux o ida ini huya ka qaqay. Rdrudan alang dwiyaq cuxal u ini kramil ka qaqay daha, karac o sow bay dmamux sapah daha nanaq, ana inu ngangc o qulung niqan daping daha kana. Sow nii clokah mi mqaras bay kndusan daha mniq alang dwiyaq ka rdrudan cbiyaw.

 

105 年全國語文競賽原住民族語朗讀【都達語】 國小學生組 編號 1 號
爺爺的腳印

爺爺很喜歡去野外打獵、獨自住在山上的工寮。一次,爸媽帶我工寮看爺爺。抵達時,他正在床上睡覺。第一個映入眼簾的是爺爺的「兩個大腳掌」。我跑到爺爺床邊叫醒他,「爺爺!我們來看你!」又問他「您的腳掌為什麼又大又厚呢?」

爺爺起身,帶著我坐在火爐旁說:「爺爺從小就沒有穿鞋子,所以我的腳掌才會又大又厚!」我問:「您怎麼不買鞋子呢?」爺爺說「以前沒有賣鞋子,我的同伴都沒有穿。我的腳掌取代鞋子,我穿鞋子反而不會走路啦!」

「我像你一樣大時什麼都不怕,處處都有我的腳印。樹上、深山、通往小米田的路上都是我的腳印。」

我知道了以前沒有鞋子,無論走、跳、跑在泥土上、草地上和石頭上,腳掌都沒有關係。從前部落的老人家是不穿鞋子的,天空好比自己家的屋頂,屋外的任何地方一定有他們的腳印。祖先就是這樣輕鬆、愉快地生活在山上部落。

 

 

文章資訊
文章年度105
文章編號1
文章組別國小
文章語別都達語
族語標題Daping qaqay tama rudan
漢語標題爺爺的腳印
文章作者伊萬納威
漢語摘要