105 年全國語文競賽原住民族語朗讀【都達語】 國小學生組 編號 3 號
Ita sediq tnpusu Taywan

Nii ta nniqan Taywan saya u niqan bay hangan na, klaun bay kana sediq babaw dhran ka hiya, yasa way kcka bay paru ucilung ka hiya, niqan egu dwiyaq, niqan egu qsiya ayu mi yayung, niqan egu bay klan sediq uri way mniq hini. Kiya mi biqan daha “ Furmosa ” ka kingal hangan na uri.

Taywan saya way niqan ka sediq sun Plmukan, niqan ka sediq sun khilang mi tlu, niqan ka sun daha “ Yuncumincu ” uri. “ Yuncumincu ” o kiya ka sediq bay tnpusu Taywan, cbiyaw hari han o wana mngari kluwan ka sediq tnpusu Taywan. Maka bukuy do wada mlutuc phyuwan ka empitu kluwan sediq tnpusu Taywan uri. Saw ka Itasaw, Kavalan, Truku mi Sakizaya, dhoq brah kngkawas mataru ciida do wada ta qulung mhiyu ka hangan ta Sediq uri da. Hiti bay pnhyuwan o kiya ka Kanakanav mi saaruwa daha kluwan sediq, saya do wada mrana dhoq maxal mataru kluwan ka sediq tnpusu Taywan da.

Tnpusu sediq Taywan u niqan ka way mniq ssiyaw ucilung, mkan nanaq mnhru ucilung mi mdakil kcka ucilung ka dhiya. Sow ka Amis, Yami(Tau) mi duma Paiwan, Toda saya. Niqan ka way mniq alang dwiyaq uri, sow ka Tayal, SaiSiyat, Thao, Tsou, Bunun, Rukai, Sediq, Paiwan mi Truku. niqan ka way mrimax sediq Plmukan uri da, sow ka Puyuma, Kavalan, Sakizaya mi duma Amis, saya do wada hbaraw bay ka thdil alang brnux uri da. Sow nii ka nniqan ta ita sediq tnpusu Taywan saya da.

Ita sediq tnpusu Taywan saya, niqan bay ririh na ka wgwaya kngkingal kluwan sediq. Kiya mi mklawa tnan baraw way bqanan na kingal diyax “ Smiyan ” ka kngkingal kluwan sediq, pusu na o iyux pkla lqlaqi hiti mi pkla pniyah icil alang sediq quri sow endaan mi knkla rdrudan cbiyaw. Smiyan ta Sediq o niq 31 diyax 12 idas kngkingal kngkawas, diyax nii mtduwa msangay kana ka dSediq, musa mqaras mthuy oda ka dSediq. Uxay kiya o musa alang na nanaq, qmita tama rudan mi bubu rudan, smiling quri wgwaya ta nanaq.

Saya musa sapah pyasan o tduwa ta smluhay kari ta nanaq uri, malu bay qbhangan ka nhiti kari rdrudan ta cbiyaw. Tduwa ku pniyah hini mkla endaan rdrudan cbiyaw, tduwa ku pniyah hini smluhay knkla rdrudan cbiyaw. Qrasun bay niqan mptsa tmsa tnan matas patas, muyas uyas mi rmri rudan cbiyaw, msuwil pkla quri oda laqi qridil “ Tminun ”, msuwil pkla quri oda rsnaw “ Pusa wasil, dangaw ” dsow nii. Kndah hini wada egu bay ka klaun mu wgwaya rdrudan cbiyaw, mqaras ku bay “ Tnpusu ku Taywan ka yaku, Sediq ku balay ka yaku ”.

105 年全國語文競賽原住民族語朗讀【都達語】 國小學生組 編號 3 號
我們台灣原住民族

現今的台灣有原住民族和漢人。原住民族是最先住這兒的人,過去大家知道九個族,之後有七個族被正名起來,現在原住民族已經增加到十六個。

原住民有的住在海邊,如阿美族、雅美族、部分排灣族與太魯閣族。有的住在山上,如泰雅族、賽夏族、邵族、鄒族、布農族、魯凱族、賽德克族、多數的排灣族與太魯閣族。也有的幾乎與漢族混居了,譬如卑南族、噶瑪蘭族、撒奇萊雅族與一些阿美族,也有很多族人已遷徙到都市。

各族都有代表的文化節日,因此政府為各族訂定一天為「原住民族日」,讓後代子孫或其他人,了解我們祖先的歷史與文化。賽德克族的節日是每年的1231日,這天所有的賽德克族人都可以放假。

現在去學校可以學習自己的語言,學習祖先的歷史與智慧。很高興有老師指導我們寫字、唱跳傳統舞蹈,有時候介紹女性的生活技能「織布」,有時候介紹男性的生活技能「狩獵」,從這裡著實學到很多祖先優質的傳統文化,我很高興我是台灣原住民,我是賽德克族。

文章資訊
文章年度105
文章編號3
文章組別國小
文章語別都達語
族語標題Ita sediq tnpusu Taywan
漢語標題我們台灣原住民族
文章作者伊萬納威
漢語摘要