105 年全國語文競賽原住民族語朗讀【知本卑南語】 國小學生組 編號 3 號
talaulepan temakesi

“ tang! tang! tang! ” kema maruni na pararuniyan. a katalaulepan lra za sinsi zi za temakakesi harem. kemay i takakesiyan mupatraran na temakakesi. salaw vuri’awan.

kani takakesiyan mu, ulra na maekan ziya zatu kenamayan. alra mu piwari mekan a semavalr kemaku! ulra na menadanadam semenay za temarapuyuma lra, za temaramingkuk lra. ulra na venavalray zatu vavalrayan. alra mu ’azi tu pasekazi tu vavalrayan adaman kemaku! ulra na maiyup za vativatiyan. ulra na ’ema’aw za zanum.

kani salripi mu, ulra na mukakuwa maya’a kantu wadi. alra mu ulra tu taturuwan! ulra na mukakuwa kiputremela. alra mu ulra tu nanayan iyan! ulra na mavarerlrarelrang. Tu patrepayay na sinsi mena’u, zi tu kaselruwaw. ulra na mite’ang, alra mu kemiyaanger za eman! ulra na malraselras marengay. alra mu maw na ’azi maranger pakinger za trau! ulra na maahelr mukuwa i watra’iyan.

kani lalinayan mu, ulra na malalinay za mali, ma’ara’araw kana mali. sapene’ zatu saringan! ulra na malalinay zatu kalalinayan i takesiyan. na kalalinayan i takesian mu, sazu zi marekamelrimelri. ulra na mukulukulung kani tralunalunan. mitralunan lra tu kavang.

nu haremaremay mu, kinger ta za patilralre’is. nu haremaremay mu, kinger ta za emuyay’uy. nu haremaremay mu, kinger ta za laaliked. dalikedikan zi semamangalan na temakakesi.

inku mu, salrangan mi za i ngizalri. mukuwa mi mena’uwa za niyam sinasasalem kani takakesian i likuzan. ulra a kulang, a kudumu, a vurasi. na kazu temelriyu ns tralunan mi uvutraw ; niyam ki’uleday na kulang ; na tralrevek mu mi lratuzay. mukuwa mi menauwa za ’aputr. sazu na muvakar na ’aputr. salaw vulay zi ngulringulr.

“ tang! tang! ” kema maruni na pararunian. “ kemazu lra lriketri ini na talaulepan ” kema na temakakesi. na kazu ziya iyan na temakakesi mu, pakunamun pavekas mukuwa tremepaya zatu takakesiyan temakesia!

105 年全國語文競賽原住民族語朗讀【知本卑南語】 國小學生組 編號 3 號
下課

「鈴鈴鈴!」鈴聲響了!是下課時間,學生從教室衝出來,很熱鬧耶!此時,教室裡有人在吃早餐,有人在學唱族語歌、中文歌,有人在寫作業,有人在唸故事書,有人在喝水。

走廊上,有人去找弟妹,有人去醫務室,有人在追逐,正好被老師碰上而挨罵!有人在發呆,也許有心事!有人在說悄悄話,有人匆匆地要去上廁所。

運動場上,有人玩球,搶來搶去,流了滿身汗。有人玩遊戲器材,有人在草皮上翻滾,弄得滿身是草。

我和好朋友到教室後面,看看我們種植的青菜、玉米、地瓜。拔除長出來的草、捕捉吃青菜的蟲,長得密集的地方就間拔。有時也會去看花,花開了又香又好看!

「鈴鈴鈴!」鈴聲響了!是上課時間。「十分鐘的下課時間,怎麼過得這麼快啊!」學生說,不論在任何角落的學生,都紛紛地奔向自己的教室,上課去囉!

文章資訊
文章年度105
文章編號3
文章組別國小
文章語別知本卑南語
族語標題talaulepan temakesi
漢語標題下課
文章作者陳金妹
漢語摘要