104 年全國語文競賽原住民族語朗讀【德固達雅語】 國小學生組 編號 2 號
Daha hido

Cbeyo bale hayan we, wano ba keeman nanaq bobo dheran nii, uka diyan. Mqraqil bale ka kndusan seediq ciida ma, ini krana ani tikuh ka ooda seediq duri. Kika mosa cmeyax qhuni harung ka seediq alang, sledax  daha mmiyak sapah ma, mosa qmeepah neepah daha.

Niqan kingal ali, hmiru harung ka daha rseno alang, thhiru mmaha qmeepah neepah daha. Inu dungal, mnetun bgihur spgeriq paru, wada na muwa pgriqun quri karac baro ka daha rseno nii di ma, pqeya naq karac baro hiya di, kika wada mtdaha mghido di. Daha hido nii de mssriyux pledax bobo dheran hini, mgeqi kingal de mkala ka kingal dungal, so nii de diyan klaali di ma uka keeman. Maku mdengu mhuqil kana pnhmaan ma, uka uqun ka seediq alang, kika skkingal mhuqil ma, mdudul mrana ka hnqilan seediq alang.

Kika msseli kana ka seediq alang ma mpprengo “ Ima ta ka maha mtduwa mosa cmebu kingal hido ha? ” mkkesa mpprengo, niqan ka rudan, riso ma riso hari ka mkmosa cmebu hido, kika gmao daha rudan, daha riso ma daha riso hari ka skgulan daha mmaha cmebu hido. Gmabul mmaha  ciida ka dheya  nii,  stngayun daha tmquri qmuru sekuy ka demux macu, pndaha qmuru sekuy tmquri kana dheya nii ma, lhugan daha waso birac daha. Madis mudu ppuqun daha moda elu duri ma, srehak daha ksiyo elu ndaan daha ka buuc na.

Ado theya bale ka elu ddaun daha, meniq ka daha rudan kii de, wada moda mhuqil elu ma ini dehuk ka dheya. Meniq ka daha riso ma daha riso hari we, wada qulung dehuk hhreyan hido. Kiya de psnama mcebu hido ka dheya nii, ga bale smtarang kingal hido ka dheya nii, cbuun daha ma wada daha kmaxan; wada mgeqi ka kingal hido kii de, smbaang tgkingal hido dungal, nii ba hani so pgkala ka hido kii we asi daha pstrengi cmebu. Wada daha cbuwan ckceka ba hei ka hido kii ma, mquri ngenguc cmeriq ka dara hido, kika kndudul amah uka ledax ka hido kii di, kiya ka idas ga ta taan karac baro saya. Meniq ka dara na de, ga naq sbbuli karac baro ka duma, mdengu tqpuruh de kiya ka pngerah ga ta taan karac baro saya. Mtuting bobo dheran hini ka duma dara na, mdengu tqpuruh de wada mgbtunux paru ga bobo dheran nii.

Peeyah ciida de kingal bale ka hido di, niqan keeman ma niqan diyan, mqaras bale ka seediq gaga meniq bobo dheran nii duri. Daha riso kii de, ado wada rudan duri di ma, wada moda mhuqil elu yyahan daha ma, ini dehuk alang, wano ba daha riso hari ka wada meyah dehuk alang. Mmeeyah de smnegul elu niqan mudu ka dheya daha nii, kiya ka buuc mudu pnuqan rnehak daha mmaha di, tena so bbuyu mudu qtaan ma, niqan ka bubu mudu rudan ga mdengu huqil duri. Dehuk alang ka daha riso hari nii de, tena qudi kana tunux daha, tuting ka rupun daha ma psrumo qmita ka doriq daha duri di. Ini klai seediq alang ka dheya nii di, dheya naq rmengo mesa “ Yami ka mnosa cmebu hido ”, kiya ka mqaras meyah smterung ma tmdahu dheya kana ka seediq alang.

 

104 年全國語文競賽原住民族語朗讀【德固達雅語】 國小學生組 編號 2 號
兩個太陽

以前只有黑夜,生活非常辛苦。族人只得切松樹木片點火工作。

有兩個男人帶著點燃的松木片,一路照亮去田裡的路。不料遇上龍捲風,把他們捲到天上,並掛在空中變成二個太陽;二個太陽輪流升起,使農作物枯乾,族人因缺糧而逐漸死亡。

部落選了二位老人、二位青年及二位少年去射太陽。他們裝滿兩節細長竹子的小米掛在耳朵上,帶了橘子,將種子埋在路邊。二位老人在中途離世,二位青年、二位少年到達太陽升起的地方。

他們射中太陽的中心,往上噴出大血塊變成月亮,小的變成星星,血塊往下掉落變成大磐石,小的變成沙粒。月亮、星星、大磐石及小沙粒都是族人的血。

從此天上剩一個太陽,人們生活幸福。二位青年在回程死亡,二位少年回家時已老得牙齒脫落,頭髮全白,眼睛也花了。

埋在路旁的橘籽已枯乾。家鄉的人不認識他們,這二人說我們是射下太陽的人,家鄉的人便高興地迎接他們。

文章資訊
文章年度104
文章編號2
文章組別國小
文章語別德固達雅語
族語標題Daha hido
漢語標題兩個太陽
文章作者郭明正
漢語摘要