104 年全國語文競賽原住民族語朗讀【德固達雅語】 國小學生組 編號 3 號
Ita seediq tnpusu ba Taiwang hini

Taiwang ga ta niqun saya nii we klaun bale seediq, yaani mkela kana seediq bobo dheran nii, ado ka nii meniq ckceka rcilung, egu dgiyaq, egu yayung ma ruru, egu ba seediq ini pntena klegan ka gaga meniq hini, kika niqan kingal tnyanan daha kesun “ Huarmosa ”. 

Taiwang hini saya we niqan Plmukan, niqan Kihilang daka Telu ma, niqan ita “ Yencuming ” duri. Kesun ita Yencuming nii we seediq tnpusu ba meniq hini ka kiya, cuuxan hayan we mngari klegan ka ngayan ta ita Yencuming ga Taiwang hini. Hndure hari de, mpitu klegan ka ita Yencuming wada mssnegul pheyu ngayan daha nanaq bale, so ka Itasaw, Kavalan, Truku ma Sakizaya, betaq berah knkawas mmteru hndure de, wada nami qulung pheyu ngayan miyan kesun Seediq Bale ka yami duri di. Mhiti hndure nii dungal duri we, wada pheyu ngayan daha nanaq ka Kanakanav ma Saaruwa duri di. Kika saya de, wada mrana dehuk maxal mmteru klegan ka ngayan ta ita Yencuming Taiwang nii di. 

Ita ka seediq tnpusu Taiwang hini we, niqan ka ga meniq ssiyo rcilung, mekan qcurux mneniq rcilung ma so hmneru rcilung ka dheya. So ka Amis, Tau, duma Paiwan ma Truku saya. Niqan ka ga meniq so alang lmiqu ma dgiyaq duri, so ka Tayan, SaiSiyat, Thao, Tsou, Bunun, Rukai, Seediq, Paiwan ma Truku. Niqan ka ga mtgimax meniq Plmukan duri, so ka Puyuma, Kavalan, Sakizaya ma duma Amis. Bale ba duri, saya de egu bale ka ita Yencuming wada tgimax meniq alang Plmukan di, so nii ka ga niqun ita Yencuming saya.

Ita Yencuming nii we, niqan ta naq knkingal Gaya ta. Kiya ka seihu pqlahang ita saya we, ga na spheyu “ Ali Smseman Yencuming ” ka knkingal klegan Yencuming, dungus na we pgklaun lqlaqi ta bobo ma, pgkela seediq pneeyah nuinu, ado so mkela ndaan rudan ta  ma Gaya ta.  “ Ali Smseman Yencuming ” miyan yami Seediq Bale we, ga stdehu idas 12 ali 31 knkingal knkawas, kingal ali nii we msange kana Seediq Bale, tqqaras mosa suupu mteme kesun “ Ali Smseman Yencuming ” nii, uxe duri we mosa mita tama rudan bubu rudan alang, mosa ptgesa gaya nami.

Saya mosa ta sapah pyasan de niqan sslhayan kari ta nanaq, malu ba qbhangun ka hengak kari pnsltudan rudan ta. Klaun ta peyah  hini ka knkela rudan ta cbeyo. Niqan ka tmgesa matis patis, muuyas uyas ma kmeeki duri, moda naq we pgkela “ tminun ” ma, moda naq we pgkela “ mosa lmiqu ”. Peeyah hini de mkela ta Gaya pnsltudan rdrudan ta cbeyo. Mqaras ku bale, yaku we Seediq ku Bale Yencuming Taiwang hini.

 

104 年全國語文競賽原住民族語朗讀【德固達雅語】 國小學生組 編號 3 號
我們台灣原住民

現今的台灣有原住民族和漢人。原住民族是最先住這兒的人,過去大家知道九個族,之後有七個族被正名起來,現在原住民族已經增加到十六個。

原住民有的住在海邊,如阿美族、雅美族、部分排灣族與太魯閣族。有的住在山上,如泰雅族、賽夏族、邵族、鄒族、布農族、魯凱族、賽德克族、多數的排灣族與太魯閣族。也有的幾乎與漢族混居了,譬如卑南族、噶瑪蘭族、撒奇萊雅族與一些阿美族,也有很多族人已遷徙到都市。

各族都有代表的文化節日,因此政府為各族訂定一天為「原住民族日」,讓後代子孫或其他人,了解我們祖先的歷史與文化。賽德克族的節日是每年的1231日,這天所有的賽德克族人都可以放假。

現在去學校可以學習自己的語言,學習祖先的歷史與智慧。很高興有老師指導我們寫字、唱跳傳統舞蹈,有時候介紹女性的生活技能「織布」,有時候介紹男性的生活技能「狩獵」,從這裡著實學到很多祖先優質的傳統文化,我很高興我是台灣原住民,我是賽德克族。

文章資訊
文章年度104
文章編號3
文章組別國小
文章語別德固達雅語
族語標題Ita seediq tnpusu ba Taiwang hini
漢語標題我們台灣原住民
文章作者郭明正
漢語摘要