107 年全國語文競賽原住民族語朗讀【中排灣語】 國中學生組 編號 1 號
tatuluan ni vuvu

izua ta kuvarung, ti vuvu i Ljuzem mavan nua tjalja nanguanguaqan a caucau i kacauan. iniyake selangeda tu izua pinakisankuya nimadju, iniyake pacun uta tjai vuvu tu remumalji ta timaimanga, na saceqalj sakamaya a kinamudinganan nu secevung tjaimanga. ti vuvu macaqu aravac a tjemaucikel ta milimilingan kata semenay ta si kivangavangavang a senay na kakedrian. a kinatjengelanglayan a keman nimadju mavan a vurati. izua nu tjevasain sa siyav na ta vutjulj, izua nu vineljukuin sa puqecevi ta cinavu, izua nu rindraridren sa pupaketjavi, izua nu si pakesa ta padai, malaing tu kudain a kemesa ni vuvu a vurati.

ika masutjaucikecikel ti vuvu, liav aravac a situlutulu a sipazazekazekatj tja nuamen. nu keman itjen a kakedrian, nakua keman ta kakudrakudralan ta nasanguaq a vurati aya, maruqu mun nu mavavua mun aya ti vuvu. tja sipasangav tjai tjama tjai su vuvu a ramaljemaljeng a maluljaluljai aya. nu seman siav ta remapanan, iniyake pavavala pacun tjaimadju tjuki tjaisangas a keman ta malaing tu ciqav tu quzang tu gang. semiav timadju sa sipasangav sakamaya tjanuamen a pinicekelj a nasanguaq. izua sinitjaucikel uta nimadju tjanuamen ta nakuya a keman ta tjulja a kakedrian aya, mavuca mun aya ti vuvu. aicu a tatuluan ni vuvu tjanuamen, nakuya maramilj, nakuya patalaq, nakuya ika kemeljang ta kipasangav aya.

rupakisamulja aravac uta ta kitulu ti madju. maljiananga a nu sinljavakan a zidai aya, nu ika tjen a kikavecengel a kitulu i gakku anema nu sikizatar ta pairang nu ngidanga aya. tjalja sipuliavan a qivu ni vuvu azua, maya mavudraqut! kasetukezu! aya, katua maya liav a kai na kakedrian, a kakedrian masi calinga, nakuya masi angalj, aya. nu izua saliman na nia sikataqaljan, sau ljaqunu! sumusu ti tjaina ti tjama! aya. sau paljiljii! ti su vuvu kikemudakuda anga, aya! aiyanga a pakisamulja ni vuvu.

nu ku kaljuing anga kinemenem tucu, aicu a tjaucikel a tatuluan ni vuvu anga a si papuvaruarung, si pakisamuljamulja tja nuitjen a kakedrian tu paqaljayu, tu kiljivaku, tatja vavulungan a caucau. titjen a kacalisian liav angata a tja kakudan a pasamaquliqulip anga, ari kisamuljai, ulja na mapuzangal a tja ramaljemaljeng nu ngidanga.

107 年全國語文競賽原住民族語朗讀【中排灣語】 國中學生組 編號 1 號
vuvu的話

vuvu Ljuzem在我心中是全世界最好的人。因為我不曾看過她大聲駡他人。她很會說故事和唱傳統唸謠!最喜歡的食物是地瓜,有時吃去皮蒸熟的地瓜配猪肉湯,有時吃地瓜湯配cinavu,有時刨成地瓜籤配花生,有時直接煮成地瓜飯。

不同時候vuvu總有說不完的教誨,她說小孩子不能吃比較大的地瓜,因為到田間工作時,吃大地瓜的小孩子會像大石頭一樣滾下來,要把大的留給長輩吃。若有機會煮溪流裡捕來的魚、蝦、螃蟹,她總是先喝湯把好吃的留給我們。

她說小孩子不能吃鰻魚,吃了會眼瞎,她也勉勵我們認真讀書,最常告訴我們「不要懶惰要努力」,「小孩子不要說太多話,要有耳朵不要帶嘴巴」,「去幫爸爸媽媽的忙」,「去看看老人家需要幫什麼忙」,vuvu總是不厭其煩的教導我們!

她總勸導我們懂得敬重愛戴長輩們。排灣族有許多優良的傳統美德逐漸消失了,讓我們一起努力讓部落的長輩看見我們的用心。

文章資訊
文章年度107
文章編號1
文章組別國中
文章語別中排灣語
族語標題tatuluan ni vuvu
漢語標題vuvu的話
文章作者邱霄鳳
漢語摘要