106 年全國語文競賽原住民族語朗讀【巒群布農語】 國中學生組 編號 2 號
Sinap i luhum a Biung

Ma-aq dau tu qabasdengaz ang a hineza dau ka mapakadedaz tu tastupakatuszang heza tu tatini ka kanahipun ingtaa tu uvaz-aznanaz. Patinganan nai ta tu Biung nanu tu mopa ta sia Bununtuza ka ispatingangan  ma-aq a tinustangusan tu uvaz-aznanaz a asa tu ispatinahaan qudasnanaz matingaan.

Ma-aq a Biung un a mastaan mataliskang tindankul haan asang nai ta tu uvaz-az  ma-aq is mapatindankul a uka tu tatini ka maqtu listulun istaa. Makuniv a Biung tupa tu uka in tu tatini ka mastaan zaku mataliskang  kopa zaku mopa mastaan saak mataliskang tindankul haan nastu dalaq ti tu bunun.

Heza tu tastuqani-an tindankul a Biung haan bukzavdengaz. Saduu tu mopin heza ka kingangaus istaa tindankul. Miliskin a Biung tu mataliskang saak a mavia kis samanqa saduu ki idadaza haan dihanin luhum tu kingangaus zaku-an i? Mililiskin naip a ni-i in maqtu sisasaa makanmanqa naip tinmamangmang tupa ki idadaza haan dihanin tu luhum tu luhum tanam ata pentataip tu simaq ata ka mastaan mataliskang?

Tonadiip in a qani-an tu na pentataip miliskin a Biung tu aih na pinve-uk asu. Tisqa kalinluvluv tupa Biung tu ma-aq is panduu in a luvluv a na kitngaa in ata pentataip. Ma-aq mas kitngaa in pentataip a tuza tu Biung a kingangaus.

Mututusbut a Biung tindankul tonahaan in haul bukzavdengaz  samanqa saduu tu iskatanhiku ang a luhum kamingmiing maqenan miliskin tu maqtu qo saak pinve-un tu? Nanu tu na zaku ka mapinvai! mopa ta nepa kamingmiing manahip miliskin haan is-aang a ea haa! Heza qan a haan tanangaus batu ka pantustusan i Biung a panbesuqaz naip haan nastu dalaq.

Ni-i naip niapniap tu samuq is tonquvali in samanqa ka Biung saduu ki diqanin a mavia tu minmopa ti ki tupa itanhiku zaku-an a luhum i? Mavia lopa ko tu itanangaus in zaku-an i? Masalaqit a Biung tupa ki luhum tu luhum na pinve-uk asu unis in!

Matingna ka Biung matinmananu tindankul lusqa tu ma-aq is samanqa naip a saduu tu sidahda-un naip i luhum sanavaiq naip masinap a nanu tu ni-i tu ulistulunan. Mavia saak tu ni-i tu maqtu ulistulunan i? Zaku nopa ka mastaan mataliskang qe! Madikla sia Biung a is-aang  makan-epzaq haan nastu dalaq tatangis.

I-ita in nepa minqansiap tu samuq is heza-an ata amin bunun i pes-upa-an  ka-a tu kas-aang tu mateklas in matamasaz in. Ni-i tu sia simaq mapinvai simaq pinve-un ma-aq haan nastu dalaq ti ka mastaan kadimanun a sia kis sinisnis ni-i tu mapakunivkuniv.

106 年全國語文競賽原住民族語朗讀【巒群布農語】 國中學生組 編號 2 號
追白雲的Biung

有個小孩叫Biung

Biung在部落裡跑步最快,連動物都無法在他的面前順利逃脫。Biung認為,他是世界上最會跑步的人。

有天Biung發現一個白雲永遠跑在他的前面,他越想越不甘心,便對白雲挑戰。

終於到了比賽的日子,不管如何拼命的追拼命的跑,都會發現白雲領先,不管再怎麼追也追上。

他終於知道,每人都有極限,不要自以為聰明有能力,重點不是誰贏誰輸,人在自然面前應該謙卑。

文章資訊
文章年度106
文章編號2
文章組別國中
文章語別巒群布農語
族語標題Sinap i luhum a Biung
漢語標題追白雲的Biung
文章作者張玉發Manias Istasipal
漢語摘要