107 年全國語文競賽原住民族語朗讀【噶嗎蘭語】 國中學生組 編號 3 號
hibangan

nizu yau lanas na lazat na pinilepaw, paqenanem ti iku masubulin ta leppawan.

masang pataz iku meRaputuy azu paqenanem ta leppawan, kasianem tu paqenanem mai tu lazat ta leppawa, ngid qawRat tu nianiana uu ngid quni, ngid qan tu naququni ay, qasukaw qeman tu nazau ay zin na tama tina ay, mai tu lazat tebabal meqayla. wanayka, tangi deddan maken mai tu lazat meqayla ay, ta aneman ku mai sastaR tu kenasianeman ku.

paqenanem ti iku masubulin, mai tu lalazat ta leppawan, mai tu sunsuni ta leppawan qaya, temayta tu tilibi nani? nizu qalizaqan na tama ku temita ay, mai iku melizaq temita, ta setangi deddanan, ngid lusit tama ku, tayta ka ti aisu niana ngidan su tayta tu tilibi zin na, timangu tatalinan ku tilibi kemilim tu sataytan, Raynguan ku tu niana ngidan ku tayta; qangima ita kemilim tu sakelawkawyan na leppaw, yau tina ku ta leppawan nani pataz meqayla timaikuan, simmeng tu saqsaqayan mai ngid panmu kelawkaway tu zana leppaw, mai ti ngid tayta timaikuan, qumRas timaikuan pasinap, semupas tu tipan na leppaw, meRasa tu Ribang na leppaw, temuluz tu muwaza sakelawkawayan, ta setangi, melusit ti tina, kingngan na ti iku ta leppawan, wanayka, ta stangi mai iku tu sakelawkawayan, liwaliw mai nengi ya anem ku.

dutemutemut anem ku manna senazau? hibangan ti, ussa sasaqayan ti ni? mapesi samangsa tu hibangan deddan? paqenanem ti iku ta leppawan, Rayngu ti iku mawRat, ngid iku lusit, nizu pukelisiwan, wanay ka wanma saRasan tu ’may nibulan na tama tina ku tu kelisiw. qangima iku padingwa tu kaput pakungku sidadak! padingwa mesiRis qaya samangsa, yau kinusepat ulima betin dingwa na kaput ku, mai tu paqenananem mipil tu dingwa ku ay, manna senayau uu mesukaw iku tu kaput ku ni? Raqana mai ti tu kaput ngid ipil tu dingwa, tayta na dingwa ku taqa ti ipil, uu melilizaq ti mawRawRat qaniau, mai ti ngid Rining temalumbi timaikuan?

tuRuz na yau ti paqenanem kaput ku mipil tu dingwa, munna imi simtawik nani qawka iku mipil timaizipan na, qemuni aizipna tangi.

manna? senking? manna Raynguan ku? utani deddan setangi? ay ya! seking pa ti temawaR mana Raynguan ku ti, kalingunan ku ti? simunang iku madded tazian, dutemutemut tu mai tu kaput mawRat, ussiq tima deddanan? naquni ya ka ti meliyan tu sudad, mai ti iku tu anem tu qawRatan! mai iku tu anem tu qawRatan! ta tangi deddanan melalazuk ti ku meliyam tu sasekingan sudad.

107 年全國語文競賽原住民族語朗讀【噶嗎蘭語】 國中學生組 編號 3 號
假期

今天家人有事外出,只剩我一個。

之前,一天到晚想著這天的到來,幻想做平常想做卻不能做的,吃平常想吃卻吃不到的,可以盡情玩耍。只是,這天真的到來,心中卻和自己所想的不一樣。

剩下我一個,家中空蕩蕩的,看電視嗎?爸爸老是看我不喜歡的節目,今天他把電視讓給我了,我卻不斷轉台,不知道要看什麼;來做點什麼吧?平常覺得媽媽看我不順眼,才叫我掃地、買東西,但現在我卻因為沒事可做而感到無聊。

難得的假期怎麼就這樣浪費?一個人在家根本玩不起來,出門就要花錢,但爸媽只留給我買便當的錢。那打電話跟朋友聊天吧!卻沒有一個接起來。終於有一個朋友接起電話,在打聲招呼後,我問他現在在做什麼?

考試?天啊!明天要考試,我怎麼都不知道?我還悠哉地坐在這裡喊無聊,只剩一天怎麼準備考試?不聊了!我今天可要忙死了!

文章資訊
文章年度107
文章編號3
文章組別國中
文章語別噶嗎蘭語
族語標題hibangan
漢語標題假期
文章作者潘秀蘭
漢語摘要