105 年全國語文競賽原住民族語朗讀【噶嗎蘭語】 國小學生組 編號 2 號
qaRapungus pa ti palilinan

palilin nani semubat tu tazusa na baqibai, ta zuman ay lazat na yencumin mai tu nazaw ay, yau ti kiyukay temuqaz, mai kintani ya lazat na kebalan melilin, mai lapusan na ya palilin na, zau nani niizaw na baqibai na kebalan zana masang ay sepawan tu palilinan, saleppawan melilin. ta ngayau na ussiq lipayan qangid ti paskua tu paskua na busu, siangatu ti melilin kebalan, qangid palilin ta ngayaw na Rabi manmet ti, yau uzusa seppawan tu palilinan¸ saqaussiq nani palilin na kebalan, tuRantuRabi mai pama temuku kikang telaquq seppaw melilin ta sammayan kezanan, simliway saleqpawan, sasepawan na yau tebaRi ay Raq isi busaR ay Raq, datebus ay kukuy.

saqauzusa nani ta tutuan na unnay deddan Rabtin yau ussiq dukian seppaw, muwaza pelisin na mai pisapatan, sukaw paqayta tu ’daq, sukaw meningu, yau ta temunawan na leppaw melilin seppaw, azu mai qinunungan ta pelisin na qasukaw, qamuawza lanas na zau saleppaw utulu tasawan, sasepawan na nani ussiq kikang temuku ay ti telaquq, imi na temuku nani qaqaidat nengi qenabinus ta, simunang mai tu tatabal qenabinnus ta, telaquq kikang pamengan ta temmaq banus na mepata ti, sukaw mesiwa tu qeluqung na, temayta tu sapispis Rainang na telaquq, muman nani alan ta anem na, penazengitan na, tupi na patapun tu ’si na meRamaz, manmin ti alan ta ti zau utulu anem, penazengitan, tupi kikilasan ta tu kintani lazat qautanian ta kemilas sasepawan melilin, niRamazan ’si na satamunan tangi deddan saqabian, senapuwaR, tebaRi ay Raq “ isi ” , busaR ay Raq, nantungus ita tu sasepawan melilin.

munna sepaw Raya ay tasaw na pinileppaw, kulikuzan na ti na saleppawan seppaw, ta palilinan saqabian wanma nipalilinan telaquq tamun, senapuwaR, sukaw pisapat qeman, yau qaya azu siqatis nipililinan paazasan ta tu iRuR uu baqsiwan ta ta Rikuman lazingan, sukaw paqanan tu qenuduan, zau ta kebalanan temuzus tu tangi niizawan zan na masang ay sepawan.

105 年全國語文競賽原住民族語朗讀【噶嗎蘭語】 國小學生組 編號 2 號
即將失傳的祭典

祭祖是向祖先致敬,是噶瑪蘭祖先遺留下來的傳統祭儀,是一種家祭。但受到宗教的影響,噶瑪蘭族只剩下少數族人進行祭祖儀式。噶瑪蘭族的祭祖是在農曆年前一星期左右舉行,祭祖前一晚開始齋戒,儀式分為二種,一種是零晨公雞啼叫前的祭拜,在廚房爐灶上舉行,家人輪流祭拜,祭品有紅、白酒、甜糕。

另一種是中午祭拜,有很多禁忌,各自的家庭在客廳舉行祭拜,不讓外人觀看或拍照,祭品有隻會啼的公雞,意思是希望明年都能有光明、順利的生活。雞需用火燒死,不可見血,把雞心、胗、肝取出跟肉煮熟,家中有幾個人祭拜,就切成幾塊,用屬於自己的那分祭拜,而雞肉是當天唯一的菜餚,不吃任何別的東西。

由家裡最年長的當主祭後,其他人才開始祭拜。沒吃完的祭物,不餵家禽,這是噶瑪蘭族到現在還遺留下來的傳統習俗。

文章資訊
文章年度105
文章編號2
文章組別國小
文章語別噶嗎蘭語
族語標題qaRapungus pa ti palilinan
漢語標題即將失傳的祭典
文章作者潘秀蘭
漢語摘要