105 年全國語文競賽原住民族語朗讀【噶嗎蘭語】 國小學生組 編號 1 號
senalazat Rami

pitasaw melana tu deddan na qaipanayan na damu, qamazemun pa tumqez semaqsaqay ay lazat ta damuan, Raqana pitasaw ta qaipanayan na ti damu, ta kinilan na lazan ay zenna Ruqulepun qaipanay, semangsangi ti tu muwaza senalazat ay Rami, yau semangi tu Rami ay pasan qaya, mazemun lazat maqezi ta zuman qizuwanan mawtu semaqsaqay tu uzusa dedanan, mazas tu semaqsaqay ay, Raya ay tasaw na Runanay ay tazungan ay qaqa, masusulun ngid paska pemmaRit tu Rami ay senalazat seRai sanku ay leppaw, kulikuzan niaq ta damuan ay paazasan ti Lung Ke’ matiw sa zenna, temingaR ti Lung Ke’ tu ta damuan ay tama seRai sabasayan na damu papanmu, temud timaimian tu naqunian ta semangi tu senalazat ay Rami, tama seRai sabasayan na damu muna temud maska naqunian ta pemmaRit patayta timaimian, muman nani paRit ka qalizaqan su ay pasan zina imi, saqabian imi pemmaRit, yau ta kinilan temayta temud timaimian ya tama seRai sabasayan na damu.

kasianem nankaputan, pitasaw ita sinanam semangsangi tu senalazat ay Rami, qawman nisangian niaq qanengi qaqasiRma tu nisangian na qaqaqa, simsuqas ti imi tu qaqaqa, taytan ta azu mai tu niana nengi sangian, timengu maken semangi mai imi tu Rasi, uumannan niaq semangi, saqabian imi semangsangi, meRayngu imi pasiqet pemmaRit, Raya bali tu kiya, kikiyama sesuRaw ti, zana qaqaqa ay nayau qaya, simpatatawa imi, muman siangatu semangi, qasiqet pa nipaRitan qakiyan niaq ti ya Rami na pemmaRit, taytan na qaqaqa qinunungan na imi pemmaRit qaya, semangi tu sangku ay tama seRai sabasayan, taytan na ni sangian niaq, metawtawa tu sa RuRusi, yau a mequlqulin ta zennan metawa timamian.

105 年全國語文競賽原住民族語朗讀【噶嗎蘭語】 國小學生組 編號 1 號
稻草人

每年都很期待部落割稻季,部落為吸引觀光客,在大馬路旁剛收割完的田裡,用稻草製作很多人形或動物,有很多來玩的大哥哥大姊姊,一起體驗綁稻草人及魚籠屋,我們跟著部落的導覽龍叔叔到田裡,龍叔叔請叔伯們教我們製作稻草人,叔伯們先試範,然後叫我們自己作喜歡的動物,叔伯們也在旁指導。

我跟我朋友認為,我們每年都有練習作稻草人,一定會作得比大哥哥姊姊們好,我們跟大哥哥姊姊們比賽,看起來簡單,作起來真難,我們一直都在重作,綁不緊,風又大,一下子就被風吹倒,大哥哥姊姊們的也一樣,我們互相取笑重新來過。為了要綁得緊,稻草綁少了一點,大哥哥姊姊們的也跟著我們學,等叔伯們製作好魚籠屋回來看我們時,笑倒在田裡。

文章資訊
文章年度105
文章編號1
文章組別國小
文章語別噶嗎蘭語
族語標題senalazat Rami
漢語標題稻草人
文章作者潘秀蘭
漢語摘要