105 年全國語文競賽原住民族語朗讀【丹群布農語】 國小學生組 編號 3 號
Maqasmava!

Maaq mita tamatina ka taqu mita uvavaz-az tu; “ Asa ata tu maqasmav kuzakuza, na niin ata mitsauqzang. ” Maqasam a imita madadaingaz tu katu mangai, maaq i mangai a, na uka mita kainikuzaan, uka amin a dinainpus, na lusqain ata qabasin minqalas, katamalun i bunun.

Ihaan ata laupakadau ka’ku isnanavaan, madiang mita napasnavaan, maszang a ka’ku imita quma kuzkuzaun mita. Maaq a haqil un a maszang dau ki dalaq unqumaun mita. Maaq i masmut qumaa, asa ata tu malabut i ismuut mapistaba, maaq i az-az batu a quma a, asa kazkazun amin a batua makai ma-uman, maaq i mangai ata a, na-asmingun a sinsusuaz, na nii a sinsusuaza tal-ia kalaas, lusqain dau ka sinsusuaza matubulsuk mataz.

Maaq dau ka ispapatas a, maszang dau ikmama-aiun mita tu via, kaul siin tangaa un; maaq i uka a is-ungququma tu qaimamangsut a, na nii ata u-kuzakuzaan i quma ta; maaq i mangai ata mapatas a, na maszang i via, kaul siin tangaa tu taubinangan, naminqaitqait, natinpangil, na niin maqtu ikma-aiun kuzakuza; na mintaimang ata amin.

Nitu kaupa ihaan pasnanavaan ta maqasmav, maszang amin ilumaq tu maqasmav kuzakuza, atikis mita kuzkuzaun ilumq, kaupa mapiningzav i lumaq, mavail i sintakukunav, masinav i hasi, tataku siin baluku. Mintun iskalunan i tina mapit-ia qaisang, mahanat i sanglav, asaun ata mapiqasmav kuzakuza.

Kama niin ata laupakadau kanasia tamatina tu qalinga kuzakuza, minmangain a is-aang, maaq i saduu tilivi saunsaan misqang maqmut, naniin ata upatasan i patasan; lismuav masabaq sauqanian, halasanin duma bunun munka’ku.

Tupa imita madadaingaz tu, maaq dau ka magangai tu bunun a, na nii intaa qabasin iniqumisan malisihal. Paqpun asa ata tu maqasmav kuzakuza.

105 年全國語文競賽原住民族語朗讀【丹群布農語】 國小學生組 編號 3 號
要殷勤努力!

父母親教導我們,認真工作就不挨餓。長輩警告我們,我們懶惰,就沒有工作,會被人瞧不起。

學校好比是我們的農田,我們在那裡工作。書本好比是農田的土地。農田長滿雜草,必須把雜草拔除燒掉;如果都是石頭,必須把石頭挖掉。假如我們懶惰,農作物會被雜草掩蓋,無法生長結果,最後枯萎而死。

文具好比鐮刀和鋤頭。如果沒有農具,我們就無法工作。懶得用筆寫字,就好比鐮刀和鋤頭生鏽、鈍掉不能用來做工,心智也會遲鈍。

在學校認真,在家裡一樣要認真。我們要牢記前輩的話,要得到幸福快樂的生活,就必須認真地工作。

文章資訊
文章年度105
文章編號3
文章組別國小
文章語別丹群布農語
族語標題Maqasmava!
漢語標題要殷勤努力!
文章作者余榮德
漢語摘要