104 年全國語文競賽原住民族語朗讀【郡群布農語】 國中學生組 編號 2 號
Mapasinap Lum tu Biung

Habas daingaz dau hai aiza mapakadaidaz tu tastu-mapadangi aizan tu tacini kanaskalun tu uvaz-nanaz. Pacinganan naicia tu Biung aupa kanasia Bunun tu ispacingan maza cinustangusan tu ubuh-nanaz hai asa tu ispacina sia tama-hudas tu ngan.

Biung hai isia tastu asang mastan mataliskang cisdadan tu uvaz mais mapasavai hai uka tu tacini listulun saicia. Makuniv Biung tupa tu latuza saikin tu ukain tu tacini mastanku mataliskang! Aupa saikin hai tastu dalahcin mastan mataliskang tu bunun.

Aiza tu hanian cisdadan Biung sia mabukzavan sadu tu mani ana aiza kingangaus saicia. Miliskin Biung tu mataliskang saikin mavia mais samangha sadu idadaza sia dihanin tu lum hai malngangaus zakuan i? Mililiskin sai-ia at nin mahtu malsasa samangha at tushit tupa mas lum tu lum namapasavai kata simabin kata mastan mataliskang i?

Tauna sainin napasavai tu hanian miliskin Biung tu ai nasavaianku kasu. Cisha kalinluvluv tupa Biung tu mais pan-utungin luvluv hai nakitngab kata mapasavai! Kitngabin mapasavai tuza tu Biung ngangaus. Ni tu zav palandu mas takiasang tu madadaingaz tupa nai-ia tu Biung mapikukuabin kasu i? Antalam Biung tu mapasavai saikin mas lum cisdadan. Makinpataz madadaingaz tupa tu Namahtubin kasu mapinvai mas lum i? Ka tu mataimang. Haitu tuanak Biung tupa tu mahtu saikin! Aupa zaku mastan mataliskang.

Mututusbut Biung cisdadan taunasainin sia bukzav samangha sai-ia sadu tu lum hai itan-ikuang kamingming cinngit miliskin tu mahtubin saikin savaian i? Sain tu mapasavai hai nau tu nazaku savai! Masa kamingming sai-ia malngingit hai ai iu! Aiza hangsia itanangaus batu pantustusan mas Biung at pantaibuhaz nastu haungun sai-ia tupa tu nalumcia maipisaincia mas batu. Paspasun saicia pushu at tupa tu ni tu mikua ni sain mapiskaina inak tu kaibiskavan  aupa zaku mastan mataliskang.

Ni tu hai-iaphai-iap tu taunghuvaliin samangha Biung sadu mas dihanin Lum hai itanangausin. Masalahit Biung tupa tu “ lum nalistulunanku kasu sanganin! ”

Macingna Biung macinmananu cisdadan haitu sidahdaun sai-ia mas lum  nin mahtu listulun mas lum. Malputaciah Biung paimangmang tangis tupa tu zaku aupa mastan mataliskang hai mavia tu ni tu listulun.

Dungzavin sai-ia minhai-iap tu kata bunun hai aizan amin mas paskaupan kaka tu makas-ang tu mataiklas at istamasazan. Kahusbun hai ni tu sima savai sima savaian isia tus-acin hai asa tu sianisnis.

104 年全國語文競賽原住民族語朗讀【郡群布農語】 國中學生組 編號 2 號
追白雲的Biung

有個小孩叫Biung

Biung在部落裡跑步最快,連動物都無法在他的面前順利逃脫。Biung認為,他是世界上最會跑步的人。

有天Biung發現一個白雲永遠跑在他的前面,他越想越不甘心,便對白雲挑戰。

終於到了比賽的日子,不管如何拼命的追拼命的跑,都會發現白雲領先,不管再怎麼追也追上。

他終於知道,每人都有極限,不要自以為聰明有能力,重點不是誰贏誰輸,人在自然面前應該謙卑。

文章資訊
文章年度104
文章編號2
文章組別國中
文章語別郡群布農語
族語標題Mapasinap Lum tu Biung
漢語標題追白雲的Biung
文章作者顏明仁
漢語摘要