105 年全國語文競賽原住民族語朗讀【撒奇萊雅語】 國小學生組 編號 1 號
kakaymawwan a wawa

inaayaw, mulecuh ku belaw tu lutungay tu tatayna, ayza a labi hamin sahenay namalabi, miladay kaku tu ina aku tayza tu heniyan a milisu’. mataenang kya lutungay i kakabi’an nu wawa, sicaedung tu salengacay atu sumanahay ku kulit a zikuc, situpel tu takuliway a kulit, tabaki ku mata, mangazu kya bihid, sa kaymawan sa! manamuh kaku cinizaan atu cina aku.

“ ayay! sa kaymawan sa kina wawa! ” samsamteken aku amiazih ciniza, cucu masangiw tuwaca tina lutungay a tataynaan, cay tuwaca pakahemhem a padiyu’ tinawa. suda hanaku ku lima amilablab tu bihid nina lutungay, ahemi’, apek, malecad tu mahka nisudatan namakapalud a minpaw. lablaban aca aku kya cayay henay ka sibukes a tukun nu tangah, kaynah hantu kaku nuyna sakamusa tu, mana pilablab tu tangah nu lutungay. tabuen nya wina nya lutungay tu tibukulu ku lima niza, haymaw hanaku amimi’mi’ kya adidi’ay a lima niza, ya lima niza saungaungay satu, mahiza amibalakasay i takuwan. waw! mulusu’ tahekal ku ngangay niza, sakamuhan tu waku kuyna nya lutungay, “ ina! mulusu’ ku ngangay i tatangahan niza! ” mananam tu kuyna nya lutungay au adidingay a sasubin ku sasipu tu i tangahay a tanang atu mulusu’ay a ngangay. manamuh kya lutungay saungay saku kuku’ atu lima, azihan mahiza utunu namuh sananay.

sakamusa ku ina nya lutungay, ci Lisin ku ngangan niza sa, winisa u ngangan nu bayi niza. sakamuhan tu aku ci Kulas ku ngangan aku hanaku, u ngangan nu baki aku. manamuh kaku tina wawaan, adasay kalamkam a balaki kizawa, kapah tu sacabayan aku midang. atayni aca kaku miazih cinizaan anucila.

105 年全國語文競賽原住民族語朗讀【撒奇萊雅語】 國小學生組 編號 1 號
可愛的娃娃

前幾天,鄰居家裡生了一個小女嬰,今天晚上晚餐後,我跟著媽媽去拜訪他們。小女嬰躺在嬰兒床上,穿著白色、紅色的衣服,戴著黃色的帽子,眼睛大大的,臉蛋嫩嫩的,好可愛!我和媽媽都好喜歡她。

「好可愛的娃娃啊!」我仔細地看著她,對這位小女嬰感到非常的好奇,忍不住稱讚她。我伸出手摸摸小女嬰的臉頰,軟軟的,熱熱的,就好像是剛出爐的麵包。我再摸摸她那還沒長頭髮的頭頂,卻被媽媽斥責說,不可以摸小嬰兒的頭。女嬰的媽媽用小小的手套把她的手包起來,我輕輕的捏捏她的小手,她的小手動呀動著,好像是要跟我玩兒。哎呀!她的口水滴出來了呢,我就跟女嬰的媽媽說:「伊娜!她的口水流到枕頭上了!」女嬰的媽媽熟練的用小毛巾擦去小女嬰頭上的汗珠和流出來的口水。小女嬰高興的手和腳動來動去,看起來她非常的高興。

女嬰的媽媽說,她的名字叫做禮信,這也是她外婆的名字。我說我的名字叫古拉斯,也是我爺爺的名字。我好喜歡這個小娃娃,希望她快快長大,就可以跟我一起玩兒了。而且,我明天還要來看她。

文章資訊
文章年度105
文章編號1
文章組別國小
文章語別撒奇萊雅語
族語標題kakaymawwan a wawa
漢語標題可愛的娃娃
文章作者督固撒耘,黃金文
漢語摘要