106 年全國語文競賽原住民族語朗讀【撒奇萊雅語】 高中學生組 編號 2 號
mibetik a kamu nu malalikit nu niyazu’

amilakuid tu sasadakayan a caculilan, amilakuid tu sabalad, katukuh i umaumahan mikilim tu sakauzip, u cacayan a bataan ku sakasasedsed sa, mangalep mangalep ku icelang. u nipada’ suan nu baki, u satabakiyay a sakatalul niyam. u kakawsan! layapen ku tabakiyay a kukay niyam, ngay malasatabakiyay a cuked nu niyazu’ kami, sadayday sa mupupu tu niyazu’. u kalabiyan a tuki, mihaming kita, dadiwen ita ku nu kasumamadan a dadiw, sadayday hanita patenak ku lukiyaw nu tuas. kahemekan a kukay atu mipada’su, malecad tu misa kimukimulu sanay a lukiyaw. palitemuh tu adingu, namuhen ku adingu, patungus tu adingu. amana kapawan tu tuas, i balucu’en ku nipasubana’ nu tuas. u beliw nu bali, tapesi’ nu udad, u tuduh nu lamal, katahkal nu lala’, kasikaz, kasikawaw, kadimel, kadihiyi. 

u nabalucu’an atu masaupu, angicen ku ipabaway isasaay didi’tu, kalalitin ku lima katatules ku balucu’ namu, amana kasasula’cus tu tademaw. kasasukapah kamu. i ayawan nu di’tu kakawsan ku masakapahay, baluden ku balucu’. u uzip ku sapisikul tu binawlan, i ayaw nu di’tu musalukiyaw kamu, hamaw mapaseneng ku di’tu atu kakawsan. sacacayen ku balucu’ nu namu, misa kakawaw sa ka sibalucuan, kadimel atu kadihiyi, pitengili tu ni patinaku nu babalaki ama ina. baluden ku balucu’ nu masakapahay, pizatengi pi saicelangi tu uzip tu sawsawni, amana kakasic, paicelangi a taayaw, a mi’dap tu binawlan asini pa’yaan ku balucu’ nu angil.

cacay a mihcaan kinacacay pilisin, pakalimulaken kami tayni. katayni ku sakapahay a selal nu niyazu’, saicelangen nu mita mudadiw musalukiyaw. hay ha ha hay! hizan nipilunguc niyam, malubicay kina mihcaan, izaw kuni patungus niyam tu tahka, mudadiw tu nu mapalaway, musalukiyaw tu nu mapalaway, mikukay tu nisabalucuan namu. 

musaliyut tu kami, makakitin tu kami musalukiyaw, malalitin tu ku balucu’ atu lima. i sananal, masaupu i sawalian, muzikec tu papah nu tayu, pasaksaken tu papah nu paza’, na katayni mukan tuni patahka. awza! awza! awza! ayza a demiad saliyuten niyam musalukiyaw, mikukay tunipisikul nipidiput namu ayza a mihcaan. i kalahukan, masaupu i pakayingan kami. muzikec tu papah nu tayu, pasaksaken tu papah nu paza’, na katayni mukan tuni patahka, awza! awza! awza! ayza ademiad a saupun niyam ku masakapahay nu niyazu’, tasandeb sa musalukiyaw, sapaka sipatelaw ku uzip nuhni, u sapitules tuni kalpacaw amidiput tu niyazu’. i sansandeb, amasaupu i putah kami. muzikec tu papah nu tayu, pasaksaken tu papah nu paza’, na katayni mukan tuni patahka. awza! awza! awza! u selal isu kumi awaway sa, icelang icelang satu tu demidemiad. 

miawaw ku kapah nu selal i cacekulen, suni nu tubtub tulu ku haymaw tusa ku kalamkam sa u amasaupuay, tabaki kalamkam kuni pitubtub sa u masaupuway ku tatama. musakamu ku tumuk a malalikid tu sa, keliden nu tumuk ku binawlan, kukay paymihcaan malubic kuni pabeli ni malataw. na balucuan niyam, patungus tu tunuz da’dac bila’ epah atu niadupan, na malataw pialai. icelangay a uzip ku selal musalukiyaw tu malikuda, u layun a ngiha ku dadiw nu tatayna amibetik, sakanamuhan nu binawlan ku malalikiday a demiad, sisa milunguc tu di’tu nu tapukuwan, diputen pasamataen ku uzip nu binawlan.

106 年全國語文競賽原住民族語朗讀【撒奇萊雅語】 高中學生組 編號 2 號
部落豐年祭之祭辭

通過路程中重重的困難,通過阻撓,越野求生,十項競技,越戰越勇。長老的祝福,是我們最大的勇氣。祖靈啊!請接受我們最大的謝意,讓我們成為部落最重要的棟樑,生生世世保衛部落。傍晚時分,我們膜拜,我們唱著古老的歌,祖先的舞代代相傳。感恩和祝福,交織成一圈圈的祭舞。迎靈、娛靈、送靈。莫忘祖先,深記祖訓。風吹、雨淋、火燒、土生、敬神、勤奮、自愛、愛人。

用誠心和團結,感動天、地、神明,你們要手牽手、心連心,不要與人衝突,你們要惺惺相惜,青年們要在神明祖靈前,精誠團結。用生命護佑部落的族人,你們要在神的對面,齊跳神的舞蹈,讓神和祖靈引以為榮。你們心要專注,做事要有信心,要自愛、愛人,要傾聽長老、父母的批評。青年要團結一致並時時思考激勵自己,不可懶惰。要奮力前進,要服務族人有奉獻的精神。

一年一度的豐年祭,讓我們同來愉悅。來吧!部落的青年階級,讓我們賣力的歌舞吧!嗨哈哈嗨!如我們所求,豐收的一年,我們供奉祭品,唱著祭歌,跳著祭舞,報答祢們的恩澤。我們圍著圈圈,我們牽手跳著,心手相連。

日出時分,群集東方,手持薑葉,蕉葉鋪地,請祢享用祭品。來吧!來吧!來吧!今天我們將圍圈跳舞,感謝一年來祢們的照護。日午時分,我們群集會所。手持薑葉,蕉葉鋪地,請祢享用祭品,來吧!來吧!來吧!今天我們將召集部落青年,跳舞至深夜,好讓他們有好的體力,繼續衛村征戰。日暮時分,我們群集廣場。手持薑葉,蕉葉鋪地,請祢享用祭品。來吧!來吧!來吧!年齡階級在祢的召喚下,日益茁壯。

瞭望台上青年階級的呼喊,木鼓聲三緩二急是集會,重擊急打是召集男人的訊號。頭目交代malalikit要舉行了,頭目帶領族人,感謝天神賜予族人年年豐收。我們以誠摯之心,準備糯米糕、檳榔、酒和豐盛的獵物,請天神接納。年齡階級用強壯之身舞出malikuda,女人們用海浪之聲吟唱敬拜你,malalikit的祭祀是族人歡心之日,更祈求天神們,守護族人平安健康。

文章資訊
文章年度106
文章編號2
文章組別高中
文章語別撒奇萊雅語
族語標題mibetik a kamu nu malalikit nu niyazu’
漢語標題部落豐年祭之祭辭
文章作者督固.撒耘
漢語摘要