107 年全國語文競賽原住民族語朗讀【賽夏語】 高中學生組 編號 3 號
’ita’ ta’alno SaySiyat

noka to’oya’ kina:at komoSa’ SaySiyat ’am ’oka’ ila nanaw ka kapayaka:i’. kamamalahang ka SinSinrahoe’ to’oya’ komoSa’ ’am tomil’itol ka kapayaka:i’ pinatawaw ma’ hayza’ lampez o hayza’ tinal’oemaeh ila, ’oka’ o nasiya pinatawaw pakhinghingha’en saboeh, ’okay koSa’ SaySiyat ’okik hingha’ no ’aroma’ ’ititi’an nanaw mae’iyaeh ra:am malnoSaySiyat. ka rayhil nom tomil’itol kapayaka:i’ bino:ay ma’ pakhingha’ saboeh. takhini’in ’ima haeba:an SaySiyat haysiya haSa’ malnoSaySiyat. ’isa:a’ SaySiyat nonak hayza’ ila koSa’en ’am tomil’itol ka’alnoSaySiyat kapatawawen.

yako SaySiyat! ’ita’ ’am nak’ino’ tomil’itol ka ka’alnoSaySiyat? niya’om hayza’ piza’ ka kinita’ kapanpanabih.

1. ray taew’an malnoSaySiyat kayzaeh a tomal ’am ’okay pakpazeng ka kapayaka:i’.

2. ray taew’an ’isa:a’ ’ima kayzaeh a tomalan katatoroe’an kapayaka:i’.

3. korkoring lomoehloehay ka ka’alnoSaySiyat ni ’oya’ ki yaba’ howaw. rengreng kil korkoring malnoSaySiyat, ka korkoring ma’ malnoSaySiyat. 

4. ray ’asang ’aeh’aehael ’a’alnoSaySiyat saboeh, korkoring malnoSaySiyat rokolon saboeh.

5. tatini’ Sapang ’ima kayzaeh a tomal kaptatoroe’an ka’alnoSaySiyat.

’ima haeba:an somingozaw komoSa’, mita’ ka’alnoSaySiyat, hawka’  ’am kayzaeh ay? ’ita’ ’am hawka’ ka kano’?

1. kapayaka:i’ pazeng ila, SaySiyat ma’ hawka’ ila! mita’ kapayaka:i’ ’iwan hapoy ka taSilotoren noka minahael, ’okay pakpazeng ka SaySiyat.

2. korkoring hawka’ kaptatoroe’an ka’alnoSaySiyat ’am nak’ino’ kita’en? haSa’ ila maehrahrang kil tatini’, ma’ ’oka’ ila ka kakSekla’en noka SaySiyat kaspengan.

3. ’ita’ tatini’ pakra:am Sobaeh ka ’in nonak a kapayaka:i’, ’izi’ pakpazeng, SobSobaehaw mita’ ka pinolotor no minahael o minahael, ’oka’ i papahobaz tabin ’inowan ma’ ’am haysiya.

’ita’ ’am nak’ino’ tomil’itol ka kapayaka:i’ o tabin ra:am malnoSaySiyat saboeh?

1. tatini’ kil korkoring ma’onhael kiSka:at ka ’in noka SaySiyat a kina:at.

2. ray taew’an kakrangi’an parpe:en ka kina:at noka SaySiyat.

3. kil ’ima ra:am malnoSaySiyat tatoroe’.

4. rengreng malnoSaySiyat pa’inrowa’ ’in nonak a ’ima ngota: maySoSowaw ma’ ra:am ila.

5. komi:im ray tiyanaw hayza’ ka kaploehloehayan ka’alnoSaySiyat kaptatoroe’an.

6. komita’ ka tilibi: ki bazbazae’ ka ka’alnoSaySiyat.

kapayaka:i’ nom tatinola’ ka howaw, kapayaka:i’ na SipakaSobaehen hayza’ ay ka howaw?

1. ’inmita’a kapayaka:i’ ki kaspengan ’iwan ka pakSekla’ ka ’aroma’ Sinrahoe’ koSa’ ’ita’SaySiyat mina!

2. ’ita’ So: sasbong kakita’ ’okik pakakSaSekla’, So: malnoSaySiyat maehrahrang ma’ koza’ kin kayzaeh bazae’en!

3. malnobaboy ’am ’okay toma:’amet mita’ kapayaka:i’, ray ’a’iyalaehoe:, palaeho:, kapaehrahrangan mina ’am ’okay hobaz ka ’inalnoSaySiyat toma:Sae’te: kakaspengan ka:i’.

ka’alnoSaySiyat noka tatini’ Sinbilan, siya noka SaySiyat kin’i’iyaeh, kaspengan ki kinra:aman. kakSekla’an nonak kil SaySiyat ’ima hingha’ ramo’ kak’i’iyaehan. So: pawka’ ka kapayaka:i’ kaspengan ’ana kano’ ma’ hawka’ ila. ’ita’ saboeh ’alnoSaySiyat ’izi’ pakpazeng!

107 年全國語文競賽原住民族語朗讀【賽夏語】 高中學生組 編號 3 號
請說賽夏族語

賽夏語被列為「嚴重危險」即將消失的語言,於是啟動搶救計畫。

如何搶救族語?

1、家庭使用。

2、家庭是學族語的最佳場所。

3、傳承是父母的責任,鼓勵常說族語。

4、在部落,大家都用族語,小孩也用族語。

5、家長是小孩最好的老師。

族語流失很重要嗎?

1、族語滅,族群亡!族語延續族群的火。

2、小孩無法以族語和長輩交談,也失去族群文化和認同。

3、家長要正視危機,積極傳承給下一代,讓其永續發展。

如何使孩子說族語?

1、一起讀教材。

2、物品貼上標籤。

3、跟精通的人學習。

4、持續接觸族語。

5、尋找教學網站。

6、看族語節目,聽族語廣播。

族語有存在的必要嗎?

1、族語是群體認同及文化的載體。

2、族人不相識也能用族語溝通拉近關係。

3、漢語無法滿足我們的需要,在許多情境,族語是更好的溝通工具,無法取代。

族語是代代相傳的語言,包含文化習俗,也是連結自己與民族的重要脈絡。

文章資訊
文章年度107
文章編號3
文章組別高中
文章語別賽夏語
族語標題’ita’ ta’alno SaySiyat
漢語標題請說賽夏族語
文章作者高清菊
漢語摘要