107 年全國語文競賽原住民族語朗讀【建和卑南語】 高中學生組 編號 3 號
inukasayan semasaharan da ’amiyan na Pinuyumayan

kani Taiwan inta na Yuancumin mu, ulra mukecep misama’ da pata mauwan. na marakaduwaduwan tu pinicauwan mu mau na Amis. na marakaytayan tu pinicauwan mu mau na Saw. iniyam na Pinuyumayan mu, ulra mi kana pukalralruwac kaduwanan naniyam pinicauwan. karuwa da sakudaw misama’ niyam pinicauwan.

a Pinuyumayan mu, ulra mukecep dekalran. nu mulaud mu, meredek i Papulu. nu mudaya mu, mau na Danadanaw, na Mulivelivek, na ’Alripay, na Tamalrakaw di na Likavung. nu mukedet mu, ulra na Kacacipulr di inyam na Kasavakan. nu mu’ami mu, palru i Pinaseki di i Puyuma. kaadu mi kani Valangaw kana henan i makalusu kana cekipan. maredalredalrep mi dekadekalr, salaw mi kalre’ayan mudangidangi.

kana ’a’ami’ami diya, marevulavulas micepa da wakasayan semasaharan. na micepa demikes mu, paadang da marekamelrimelri data kasaharan. kanidu na wari, muparaduk na dekadekalran diya i wadukan. piya lra pakadalram na temaramaw mu, na ma’ida’idangan di na rahan mu, mungsalr lra semasahar.

palrivak na ma’a’idangan pa’ira’iraw misa’ur pucepa data ’amiyan di, pana’u data kakuwayanan na ma’inayan. na vangesaran mu, marepakuwakuwa demaway da tadaw, da pecir, da ’ilrus, da resuk di da lrusung. na tayinayan mu, marepakuwakuwa da ’inupidan na ’apuc.

na vulavulayan mu, marepakuwakuwa da kantu pinadangan. tu selrecay na kuwang mu, payas marpakuwa venakevak datu linapucan na kavang di pinadang. ulra na cau na palrivak mikacing. ulra na cau na mituvilr diya di mikacing lra. ulra na cau pavavekas di miyadana’ diya di miya’apuc diya. marepana’una’u lra mu, ulra na muveliyas tu kacing, ulra na ma’iring tu pesi, karalikeliked kadu.

na musavasavak mu, marpakuwa ’emevang da lriyung. tu puwanay na lriyung i paduk kana waadukan di, tu calacalawaw na tiru’ di, tu vulru’anay kanantu canguru’ na lriyung, adi musavak na lriyung di, mukuwa timiru’a da tu kuwi na cau, karalikeliked lra mapiya na cau.

na valisen mu, semangalr da pawti di, matulutulud kantu sinangalr paliyus i renarenadan marpakuwa pavekas. na duma nu matatulud mu, madalru’ di tu ce’ce’aw na pawti. na duma mu, pavavekas mu mutani tu sinangalr di, mareveliyas diya mukuwa semangalra mu, tu alepaw lra da cau.

na lralrakan mu, tu pakayanaw kana cava’i na vavayan di, tu kedengaw na cava’i na ma’inayan marpakuwa pavekas. nadu nantu dinkalranan mu, kadu i saninin ’emuy’uy pakirev. nu musali’udeng na cava’i mu, kurekedeng pavekas na vavayan. vuri’awan da semaharan na kadu diya menana’u na cau. na sanga lra, na ilikudakudan lra mu, tu pakasaharay papiya, salaw semangal na lralrak.

puwaludus lra mu, na mukecep na dekalr di, na kemay dawilr na rinuma’enan mu, mukasakasa madikedikes tu lima muliyuliyus muwarak, ata lra madalram da markapidan lra tu inuliyusan, tu ipacilracilraw, di tu inuwarakan. na ma’ida’idangan mu mitarupung di, milrungpaw da maresasan. na vangesaran mu, pinikacingan da salaw vangesar di, maresaresan tu pini’apucan. na vavayan mu, salaw vulay tu pinadangan di, pukasa vulay tu pinaliwsan na vulavulayan. kemawan da muwavii na sirusirupan. nu mena’u ta mu, kemawan ta lra kadu i ’apu’apuc kana vulay.

a Pinuyumayan mu, adi kaduwan tu pinicauwan. aymu salaw mukepel, ta pulrepusaw ini na kakuwayanan na vulay kema ku kemiyanger.

107 年全國語文競賽原住民族語朗讀【建和卑南語】 高中學生組 編號 3 號
卑南族的聯合年祭

台灣原住民中,卑南族人口排第五位,約一萬多人。

卑南族有十個部落,往東到寶桑部落,向西邊有龍過脈、初鹿、阿力擺、泰安和利嘉,往南邊就是知本和建和,往北到達下賓朗和南王部落。分居在台東平原的山腳下。

每年舉辦聯合年祭,每個部落輪流承辦,活動當天,所有族人聚集在集會所,由祭司敬告祖靈之後正式展開。

耆老們開場唱年祭之歌和慶賀詞,男士們比賽製作工具,婦女們比賽編花環、刺繡、舂糯米糰。

少女們比賽著穿傳統服,中年男士比賽捉豬,準青年負重接力抬麻袋。

小女孩們坐在檳榔葉鞘上,男生拉著檳榔葉鞘跑。

最後是大會舞,十個部落的族人一起手牽手,穿上傳統服飾,嘹亮的歌聲,整齊的舞步,會場非常壯觀。

卑南族人口雖不多,卻很團結。卑南族有這麼優良的傳統文化,身為族人,一定要珍惜並傳承下去。

文章資訊
文章年度107
文章編號3
文章組別高中
文章語別建和卑南語
族語標題inukasayan semasaharan da ’amiyan na Pinuyumayan
漢語標題卑南族的聯合年祭
文章作者洪渟嵐
漢語摘要