106 年全國語文競賽原住民族語朗讀【南王卑南語】 國小學生組 編號 3 號
a maluwadi

marekasaima tu sinalem na asepan kana Amis. tu apiyaray dra abu i paliyuliyus kana uma. dra dadaman i, menau dra dinapalran dra trau. tu raungaw dratu bangangesaran kana Amis kandru na karauban. menau dra miyadruwa dra trau dra kemay i asepasepan mupatraran aw tu lrulruyaw. mudrimutr a misasa. na misasa i penuwar. nadru na maluwadi i, amau na kaadru i Puyuma na drekalr.

mudrimutr tu wadi na mainayan i, tu imengaw dra matrina dra puwaturekukan kana Amis. tu pakanay dra uretati, dra uled, dra mapuni dra akanan. sabelaw lra dradru aw tu kanaw tu pinakanan na manay driya.

salaw kuwatis kemiyanger tu wadi. “ pamelri mi kan baelri na mainayan. tremakaw mi dratu sinalem dra trau na asepan ” kema. aw ilremes kana Amis dratu pinakanan na manay driya.

penuwar marebeliyas i drekalr i baetaw i, sadru kemiyanger kantu wadi. alra uwabaaw driya nay? kuwadakuda ku muka benaawa kanku wadi? muka kipulranga dra nirumaenan i, adri piyamau tu pinakalrangan aw, uniyan a trau a muwai pulrang kantaw.

menau dra lralrak dra malalinay dra tuwap i baetaw i, kemiyanger dra demawaya ku dra matrina dra tuwap aw, kaykuya benaawa kanku wadi kema.

demaway dra matrina dra tuwap. aw tu pusingsingay. melesles dra belakas dra tatilu. muka mayaa dra puwabiiyan kana tuwap. penauwa kadri kana matrina na kali i burelruwan.

semaluwan dra semabalr i, paseki kana tengalr. tu tiluanay kana matrina na barasa na tuwap. tu patrepayanay kana Amis tu kinakadruwan na tuwap pubii. tu biiyaw dra bali na tuwap i, seringsering kema maruni. kilrengaw tu wadi. menau kana tuwap dratu tinutrautrau i, payas malradram nantu dinaway kan baetaw na tuwap. mudare na tuwap i, tu akerapaw tu tatilu kana tuwap aw piyaisatr mubii. tu palretrusaw tu nilrasedran na pansiyam kan baetaw. aw tu keretaw na tatilu mubii. auka mi melrulruya dremimutra kema na Amis i, aidriyu i langitr lra tu wadi.

106 年全國語文競賽原住民族語朗讀【南王卑南語】 國小學生組 編號 3 號
兩兄弟的故事

阿美族人種的甘蔗越來越少,於是在周圍撒石灰。隔日果然發現腳印,當晚青年守候在甘蔗園,見有二人出來立即追捕,捉到一人。

弟弟被捉後,阿美族人將他關在籠子,給他吃蟲子及臭爛的食物。弟弟實在很餓,不得已只好吃這些東西。

弟弟承認做錯事,不該偷吃阿美族人種植的甘蔗。也很氣憤阿美族人給他吃這些食物。

哥哥回部落後,在部落找人協助,由於兩兄弟做錯事而無人願意伸出援手。

他無意間看見小孩在玩風箏,心想若做個大風箏,就能救出弟弟了。於是製作大風箏,掛上銅鈴,搓很長的蔴繩,並找放風箏的位置,就在溪旁的山崖上。

清晨,哥哥拿了風箏、蔴繩跑上山崖,將蔴繩繞石頭,向著阿美族方放風箏,風箏被風吹時發出響聲。弟弟聽到響聲,往外一看,一看風箏上的圖案,知道是哥哥來救他。風箏的蔴繩接近他時,一手捉住蔴繩,並抽出哥哥預先藏住的短刀,割斷蔴繩立即往上飛,當阿美族人回神過來要捉拿他時,弟弟已隨著風箏在高空飛了。

文章資訊
文章年度106
文章編號3
文章組別國小
文章語別南王卑南語
族語標題a maluwadi
漢語標題兩兄弟的故事
文章作者鄭玉妹
漢語摘要