106 年全國語文競賽原住民族語朗讀【霧臺魯凱語】 高中學生組 編號 3 號
Tinukucingalre turamuru ka Silu

Kay silu ngukay ki Ngudradrekay, tinukucingalrane turamuru ka laububulu. kay kasiluane kay lasilu nguavavaeva sunanagane, la ikay ku taukalrivilane kaimaramaramaw makaelaela ku patharevane, ku tapapiane takiarakayyane. Yakay ku sapatuthingalane ki niake, ki lrekeme, laubuuubulu, tacekecekelane, lu arakayyane kay silu pusilu ki lalaimay tulamanemane, la kiparaisi su ki manemane ku niake su, tayngeane ka sapatuthingalane ku takamanemanane su ka Ngudradrekay. Kay lasilu yakay ku sakirerethane, yakay ku vicelre, kalathe, lridingi, taralaedre, kay sakiererethane laabaibadhane, kay vicelre laububulu ki sawvalay sakipaucungulane. Kay lridingi si kalathe, luka tawvaylekete kiaparaisi. kaidu kiaparairaisi ka sawvalay.

Kay silu lukarudrarudrangane, amani ku saarakaykayyane tusabadhane tusaraketane, turarukudrane.Kay silu, singikay madu ki kulau ku tangimiamiane, ala ikay ku nagane makaelaela. La kay mulrimulrithane, amani ku tamatama ki silu, ku lrekeme ini niake ini, mararamaw ki kadilrungane.

Alata thingale ka lavavalake, kikay tapangimiamiane madu, kikay saarakaykayyane ki kakudhane. Ta kaingisasingikay, ta kaisuburu, ta paluludu ku kadalranane ta ka Ngudradrekay, laani ikay ku mathariri ku kakudhane.

La ta bulru ki muabaibalrithi si thingale kay tengatenganelringa ku patharevane si pakilalibake, thingale ku niake lini, si kimusakesakene ki sakacekele, kai cacapange arakay ngiragelane, si kithimithimi, kikaelaela ki sakacekele, pangilisi kudratakitukucingacingalrane ki kasiluane.

Ku tayngeane, ani kibuubulru ku tadaredarepane tusilu, arakay kay mathariringa kay satusilusiluane ka amani kudra lrika makuciaciangalre ki kasiluane, laani kitukalra ku paysu lumalangalangay, si padrima ki tacekeceklane, lrika palralrauthu paedhaedhale ku makecenge mathariri, paucungucungulu ku kakudhane ki kasiluane singikanadrumanga.

 

106 年全國語文競賽原住民族語朗讀【霧臺魯凱語】 高中學生組 編號 3 號
高貴的琉璃珠

琉璃是魯凱族珍貴的財產。有特殊的名字,不同的價值和意義。象徵榮耀、財富、階級、避邪等。琉璃珠裝飾在服飾或頭飾,象徵身分地位。琉璃珠可以製成長、短式項鍊、手環、耳環。長式項鍊為女生主要飾物。短式項鍊是男士重要飾品和財產。耳環和手環戴在女人身上,表示未婚。

琉璃珠是婚禮中的聘禮,依據形狀和色彩,賦予不等的階級,mulrimulrithane是琉璃中的王,珍貴價值如同貴族的甕。所以,下一代的後輩要了解魯凱族的規範,不要照自己的想法去做,有部落的規律依循,能使部落的社會更和諧。

文章資訊
文章年度106
文章編號3
文章組別高中
文章語別霧臺魯凱語
族語標題Tinukucingalre turamuru ka Silu
漢語標題高貴的琉璃珠
文章作者柯菊華
漢語摘要