106 年全國語文競賽原住民族語朗讀【邵語】 國中學生組 編號 3 號
aruzay numa fanilh a rusaw

sa aruzay a rusaw kahiwan niwan tu sakpin yamin thau ya zainuan aruzay, maqa ya aruzayuan mathuaw marium sa thithu a qut, numa ya ktalha sa pania’an antu miaramaz, man antu miaramaz maqa manasha sa qut. numa kahiwan yamin ya mara sa aruzay langqisusayuan a aruzay, qauriwan yamin tmalishuqish tmaniza sa sazum, apashra’inuan dai. 

numa yamin kahiwan ya smapuk izai aruzay, smapuk s izai mara’ira’iniza wa aruzay, shana makalhturuturuiza wa tingting, isisuaiza ya thithuiza sa sakpin sa Thau, maqa s izai a aruzay ianan sa mathuaw mara’in. makthin larima wa tingting, sa mathuaw mara’in, makthin a tingting, makatanathu a tingting a aruzay mara’ira’in, miazithu a aruzay zain sa Thau “fanilh”. numa sa thau antu smapuk s izai aruzayuan. ya mara’inra’iniza zainiza fanilh, niza tu zain aruzay, ya aruzay zain sa shpuut  “langqisusay a aruzay”, antu kanin sa Thau, kalishuqish tmaniza sa sazum. lhanazaaniza fanilh, zain sa shpuut “mara’in a aruzay”, miazithu sa pupanizan sa thau, pulhalhuzun sa thau. thithu sa sakpin sa thau, maqa maqitaniza ya kanin, ukaiza sa madadazumdum a qut, mamzai azazak kmaan mani, shduu mani.

fanilh sa bunlhaz dadu mathuaw maqitan kanin. fanilh a bunlhaz madumuth antu miazai s izai hutuq bunlhaz, antu miazai sa baruqizay a bunlhaz makutnir. sa fanilh a bunlhaz mathuaw madumuth ya pintatan pinthithun pintata, putuan sa izahai pinuqaizu’an a qati, numa pintatan, pahiburan sa makamun, mathuaw tauduu kazima’un ya kmaan, ya itia s misu pintatan pahiburan sa misu. mathuaw sa shnir maqitan iqilhan, numa sa izai fanilh a bunlhaz madumudumuth ya kanin, antu makutnir, mathuaw punaraus sa afu, mathuaw qazima’un.

106 年全國語文競賽原住民族語朗讀【邵語】 國中學生組 編號 3 號
大小曲腰魚

aruzay(台語稱為「曲腰扁仔」)這種魚當牠還被叫做aruzay的時候,邵人是不會捕捉這種魚的,因為當牠還是aruzay的時候,有很多刺,拿來佐飯配菜時,要非常小心,以前我們若是捉到aruzay,還是小小的aruzay時,我們會把牠挑揀出來,丟回潭裡去,將來牠還會再長大。

從前我們捕捉的aruzay要長到六斤大左右,這才是可以捕捉的大小。大的aruzay可以長到十五斤左右,十斤、九斤重的才可以說是大的aruzay,邵族人不會去捕捉還被叫做aruzay的魚。

文章資訊
文章年度106
文章編號3
文章組別國中
文章語別邵語
族語標題aruzay numa fanilh a rusaw
漢語標題大小曲腰魚
文章作者簡史朗
漢語摘要