105 年全國語文競賽原住民族語朗讀【知本卑南語】 國中學生組 編號 4 號
pinalepuk

ini na pinalepuk na ’avay mu, nintaw inaekan na pinuyumayan kinawatrawatranan. ulra na zekalr mu “inavuy” kema marengay, na Katratripulr nu marengay mu, “pinalepuk” kema. maw nu kavarasa’an ema’avay ta za pinalepuk mekan.

nu marengay mu, a awatr ziyan nu venarasa’ ta mu, pitu wariyan. a azu inta na zinekalranan mapiyapiya mu, marasud ta mukuwa kurelranga kana kavarasa’an, iniyan ta za wari demuru mekan, mazu nu kama ta mu, kanini na kavarasa’an mu, kazu ta i palakuwan, zi maw izu na mekan ta kana pinalepuk. maruwaya ta saruma’ena’enan na dawdawan, na lralrak aruwaya kurelrang mapiyapiya kanini na kavarasa’an, zi muwalaka ata ulepan kanini na kinareparekazuwayan ’amiyan

na pinalepuk mu ’ina’avay za ziketran. nu uri ’a’avay ta mu, padulu ta ziya za vira’ na lriyapuy zi maw na lavilruvilru zi ta tukasakasayaw semavesav, zi padulu ta kana tavutav zata tatilu’ venetevet. ta deremanay ziya na lriketran za teluwa tuki zi ta ilangaw lra, ta puwanay kana luvuk zi ta tengsay emaretr zi ta puwanay kana iliyaw itras zi ta pakatrasay za ’aluzun penere’, zi nu trangkar lra mu, ta lumayaw pakaapeapelr, zi ta reputaw sakepekepel, ta pepe’aw ta puwayay pazuk kana ’asilr na ’alum na vulraw na kacuwo, zi ta travuwaw kana lavilruvilru, na lavivilru mu, maruwa pakadika siyahuwa, pakalikuzan lra mu, tu tukasakasayaw lra tremavu kana tu vira’ na lriyapuy, zi ta puwayay i lanseng demeru za aruwa parekazuwa tuki mu maderu lra aruwa ta lra mekan.

tu ’avay na pinuyumayan na pinalepuk mu, salaw imaran, ’azi dika angriw, zi ’azi matratru’a, salaw lringulr atu liwlran.

105 年全國語文競賽原住民族語朗讀【知本卑南語】 國中學生組 編號 4 號
月桃糯米粿粽

月桃糯米粿粽是卑南族的傳統食物。有的部落說「inavuy」,知本的卑南族人說「pinalepuk」,是卑南族小米收穫祭典中的主食。

據說早期收穫祭是七天,那時大家都要參與活動,沒有時間吃飯,也因所有的時間得一直待在巴拉冠,所以就以「pinalepuk」來填飽肚子 ,好讓家家戶戶、大大小小盡興地參與活動,來消除這半年來的辛勞。

月桃粿粽是用糯米做的,製作前得先洗淨備妥足夠的月桃葉、假酸漿以及綁月桃糯米糕用的繩子。首先將糯米泡水三小時,然後磨成漿,裝入布袋綁緊,用重物壓,把水分擠出,最後形成糰形的固體糕狀 ,之後再將米糰經過搓、揉,使之變得有彈性且緊密地揉合在一起,將米糰用手分成相同大小的小塊,捏平,包鹹肉,或加魚肉再包上假酸漿葉,口感略酸,據說有助消化;最後用洗乾淨的月桃葉,將全部的食材包起來,放入蒸鍋清蒸三十分鐘後,即可食用。

卑南族的月桃糯米粿粽,不但好吃,而且不易腐壞,又不易變硬,別具風味。

文章資訊
文章年度105
文章編號4
文章組別國中
文章語別知本卑南語
族語標題pinalepuk
漢語標題月桃糯米粿粽
文章作者陳金妹
漢語摘要