107 年全國語文競賽原住民族語朗讀【海岸阿美語】 國中學生組 編號 4 號
Dadaya no niyaro’

Mahakakerem ko romi’ad tatootoor sa masoni ko tanikay i salawacan no niyaro’, sata:pang ho sa afsa’ sa makaleng ko soni, matenes to mato mafana’ay a misalof to soni, safangcal sato a matengil. Yo madodem to ko kakarayan masadak to ko fo’is, mato sonol sanay to ko soni, sa fangcal sato a tengilen.

O sakafangcalaw ko ’orip no loma’, o roray koni caay to ka saan ko malingaday, saka sadak saho ko cidal lomowad to ko malingaday, tangasa sa micelem ko cidal ta pahanhan, deng to no romi’ad sa, ’orong sato to pitaw sacecacecay sato ko ’awas a minokay. Malalitemoh i rihi no facal sedi sa matatawa a malalicay, masasipalemed, ko nanay makadofah ko kinayra toni a mihecaan ato pali’ayaw to saki no dafak a tatayalen. Tada masinanotay, damsayay, fangcalay a niyaro’ koni.

Masadak to ko folad, sa sariwsiw sa siemel to ko fali, nengneng han alacelacelak to ko hana. Mato maemin masafaeloh masanek ko fali nona pala, seriw seriw sa nai rengorengosaa. Tengil han to ko soni no tanikay ngalengalef saan mato pasenengay, masinanot mato pahinoker sanay to tona palapalaan a masoni.

Sacikacikay sa i pawalian to panay a malawla ko wawa no niyaro’, o mato’asay aro’ sa i falaw mahaholol, pakimad. O fafahiyan sa i, mitapid ko mitapiday to riko’, roma i, ira ko miparparay to pinawali a padaka. Talacowa caay ka samaan ko ’orip i niyaro’, nika nengneng han ko tamdaw maemin lipahak lihaday makadofah ko ’orip.

’Araw han ko dadaya fahal o tenok to no lafii, tengil han cecacecay to, lahedaw sato ko soni no tanikay, o folad mamicelem to, polong no hekal maemin to awa to ko adeses no soni. talalemed to ko tamdamdaw a mafoti’, patedi han no folad ko widawidan no panay, seriw seriw han no fali sa matiya sa o tapelik no riyar a manengneng.

Caho ka taengad ko romi’ad, mi’orong to to sakatayal mililis to rixi’ no omah ko malingaday, sa tapangan to no malingaday a matayal. Caho caho katenes conihal to ko wali masadak to ko matiyaay o lamal a cidal patedi to hekal, sa maliemi sato ko o’ol i rengorengosan ato i papah no kilang a manengneng. Satapang to rarawraw ko tamdaw no niyaro’, o mitiliday sa matatawatawa to i lalan talapitilidan, o satapangan to no niyaro’ koni a romi’ad.

107 年全國語文競賽原住民族語朗讀【海岸阿美語】 國中學生組 編號 4 號
部落的夜晚

蟋蟀在黃昏時高聲歌唱,剛開始低沉而生澀,在不斷改變聲調後,終於找到一個最和諧的發音方式。星星在昏暗的天空中出現,歌聲變得流暢、柔和,十分悅耳。

農人們日出而作、日落而息,為了一家溫飽而辛勤工作。在田埂間相遇,農人們互道平安,祝福對方今年大豐收,互相提醒明天的工作。這是一個純樸、美麗的部落。

月亮出來了,青翠的草地瀰漫一種純淨的氣息,蟋蟀的歌聲越發激動。小孩開始在曬穀場上嬉戲、奔跑,大人們坐在草蓆上聊天、說故事。婦女們忙著修補衣服或撥下玉米粒。時光流逝,蟋蟀歌聲漸漸消失,月亮緩緩落下,整個世界安靜下來。人們進入夢鄉,稻穗在月光下泛著青綠色的波浪。

天還未亮,農人們已經揹著農具走在田埂上,大聲互道早安,開始一天的工作。漸漸地,公雞開始啼叫。不久,出現一大片顏色變化萬千的彩雲,太陽昇起。部落裡開始變得熱鬧了,學生們出現在前往學校的道路上,部落的一天也在學生們的嘻笑聲中正式開始。

文章資訊
文章年度107
文章編號4
文章組別國中
文章語別海岸阿美語
族語標題Dadaya no niyaro’
漢語標題部落的夜晚
文章作者陳金龍
漢語摘要