107 年全國語文競賽原住民族語朗讀【東排灣語】 國中學生組 編號 3 號
timitja paiwan

azua a tjawcikel, na kemasitjagaraus tiitjen a mapuljat. sa nasemanvurng tua kaatjuvian. izua azua matjatjelu a pinakaqapulu a qaqinaljan i padain aya, i paiwan aya, i piyuma aya, sanakemasizuaanga a mavadavadayanga. mavananga azua pinaka Raval aya, vuculj aya, paumaumaq aya, pakarokaro aya. sa aminitjen a semusususa tua semanvusam a masanmazazangiljan.

na masansimatjelj a tjaljetjaljan a caucau, paru mazazangiljan aya, mazangilj aya, rakac aya, qatitan aya. azua paqulid ini a maqati a papucekelj a mazazangiljan katua qatitan, pinakapapungdan tiamadju.

izua azua masantjelulj a tjaljapazangalan a pinaka qata aya, reretan aya, dragaman aya nua mazazangaljan. mavananga azua sinansawzayan nua mazazangaljan. nu mecevuang a paramamazangizangiljan nu uri pucekelj, mavananga azua tjaljapazangalan a sinalisi tua pinakamamazangiljanan. izua uta masaliyaliyaw a palisian, mavan a tjaljapazangalan a pinaka maljeveq aya. izua pulingaw a kinemenem tua palisian.

izua pinakapulima aya palingi tu uqaljay tu vavayan,izua uqaljay a kisanvenecik paru tua cukes aya, langalj aya, tjakit aya, kisanseman reretan aya. izua vavayan a pulima uta, paru kisan cemepu aya, temeic tua situngan aya. izua kivecik a vavayavayan a pitualuma, izua kivecik a uqaljaqaljay a pituakinacavacavan, babulayan a venecik sa taliduitjen a pacun. taliduitjen a pacun nu zemiyazitan a pucekecekelj tua namirava natemarar sanapukavaluan a vavayavayan, natjemawpu a uqaljayqaljay sanaqemadris.

107 年全國語文競賽原住民族語朗讀【東排灣語】 國中學生組 編號 3 號
我們排灣族

傳說,我們是從大武山群發祥,百步蛇為祖先的象徵圖騰。有三個最原始的部落是在padain部落、paiwan部落、piyuma部落,從此分散遷移,也就是所謂的Raval群、vuculj群、paumaumaq群、pakarokaro群。

我們遵循著由長嗣來繼承頭目,人民共分成有四個階層,例如:頭目、貴族、勇士、平民。傳統上,頭目與平民是不可以通婚,因為身分階級不同的關係。

有三項重要的文化三寶,稱為琉璃珠、陶壺、青銅刀,是頭目家族的重要財產。頭目之間,進行門當戶對的議婚時,那是代表頭目身分象徵最貴重的聘禮。還有很多禁忌規範,就屬於五年祭為最重要,都有巫師負責所有的相關祭儀。

有被稱為工藝師,不一定是男生或女生,例如:男生是有專門雕刻立柱、連杯、禮刀,專門製作陶壺。也有女工藝師,例如:專門編織、刺繡,女生的刺紋在手背上,男生的刺紋在身體上,圖案非常精美,視覺精彩。跳舞的時候,看到穿著傳統服裝,插著百合花頭飾的少女,插著鷹羽頭飾的勇士,非常精彩美麗。

 

文章資訊
文章年度107
文章編號3
文章組別國中
文章語別東排灣語
族語標題timitja paiwan
漢語標題我們排灣族
文章作者波宏明
漢語摘要