107 年全國語文競賽原住民族語朗讀【建和卑南語】 高中學生組 編號 3 號
tu pinicauwan i Kawsiyang

adiwyu diya kema mu, kani i Kasavakan ulra sasa kinakuwakuwa a paylang i Kawsiyang tu ngadan. nanta lra temuwa.

i temamataw ni Kawsiyang i Tuwaliyaw tatelu nadu marewadiyadi mu, mau na kemay talu i Hucin kana Siyamen tu dekalr. kurelrang adu kani Tēsēko duwa kani i Taiwan. Kikadu lra i Hēto kana Suytiliyaw na dekalr.

Kemadu mu, maruwaday lra nadu na tatelu marewadiyadi. i Kawpuwan lra mu, kasasayan lra mulaud kadu lra i Palanguy di mituluma’an lra kana paliwan i Sailing tu ngadan. mialrak lra mu, mulaud diya kadu diya i Biwa. likudan lra kaadu lra kani i Katratripulr kana adalrep i lrevelrevek. Semasalem da valikuway di demadaway da walru.

adiyudiya nadu na maruwadiyadi i Kawsiyang mu, aapat papiya. i vawtaw na ma’inay i Kawpuwan kadu muvilin i Katratripulr. na pukaduwa i Sa’iv di pukatelu mu, i lringa na vavayan. karamusavak i Kasavakan. i Kawsiyang lra na maralralalrak mu, mituruma’an kani Pawles na Kasavakan. mialrak lra kimirami lra kani i Kasavakan.

intaw na micepa adu kana parkudakuda di palayalayas kani i Kasavakan di i Katratripulr kema.

pananadam kana dinekalranan da pakangkang kana hung di panadam da kinuda puwatayhi. intaw na kemedeng parahan kemakali pu’enun kana kemay vurlruwan i likavung pudanum kani ’ice’iceng. mutu sanasan lra di kemay kanidu lra kimirami ta lra semalem kana lumay.

kemay kanidu lra. markakaduwan lra na musasavak kani i Kasavakan. di sayhu lra na dinkalranan da pavaverasan da ’uma kana paylang. tu pakakaykungaw diya di mutu san lra.

tu pa’umayay da pida’amiyan. nu penauwa lra tu wari mu, pinaveriyas lra ini na ’uma.

kana mau diya duwa na dipung kema mu, ulralrapidapida a paylang na musavak kikaduwa kani i dekalr. ulra na duwa meniwaniwan da eman diya nu mitan lra mu, tu adayaw pukuwani nantu rinuma’enan. ulra na musavak kani i Kasavakan mituruma’an kani na vavayan di mutu Kasavakan lra tu pinicauwan di tu alraalrak.

adiyu diya kana ma’idang dadu tu ’uma niKawsiyang di pawning ulra tu tiyam da Tolaku. micepa puycaicas maaded kana piyakedet palru i takaw tu ikakawangan na paliding.

kana adi pauwa da cau da uwa’umayan di mavangavang kanantu pavavekasan da paliding mu, tawki di mipaysu kema awlra na cau di nadu na demelalengan na paylang mu, kana adi pakavaaw kanantu alrak mu, tu kiyaliwwaw tu alrak kani Kawsiyang.

iKawsiyang lra mu, maruwa diya pulralrang da kiyakarunan kema lra di tu vaawaw papaya palru kana mituruma’an nadu na kiyaliw na alrak.

i kani dekalr na dawdawan tu ikinakuwa niKawsiyang mu, salaw kana vangsar di sayhu marengay kana marekamelrimelri a mawan da piningaiyan. di pukasa kana surimet ra’emec da kiyakarunan. tatena’ da kama’inayan kema di salaw ’inava tu anger. mianger di adi mapaparak da pananadam pulraalrang kana cau diya.

na paylang lra, na dinkalranan lra, na madalram diya kantaw mu, adikaadi sumungal kantu ’inavayan di katu kinasayhu anger kema a dawdawan.

na kipulivun diya kani Kawsiyang na cau mu, malayas venavati kanantu alraalrak. semalra nantu ikalalihu adiyu diya mu, kamawan da ayawan kema.

107 年全國語文競賽原住民族語朗讀【建和卑南語】 高中學生組 編號 3 號
傳說中的洪狗昌

清代,Kasavakan部落傳說中有位已成我們祖先的漢人,叫做洪狗昌。

他父親到東部,在巴塱衛(大武鄉)娶排灣女子Sailing,又搬到知本。

洪狗昌在Kasavakan與卑南族Kasavakan女子結婚,曾擔任知本、Kasavakan通事,教導牛耕,引進肥料,築射馬干圳,引利嘉溪水灌溉,附近變成水田,為知本地區水稻種植之始。

之後,Kasavakan人把土地讓給漢人墾田,耕種幾年後再還。日本時代初期,有少數漢人住在部落做生意、通婚而融入卑南族中。

身為大地主的洪狗昌,在高雄經營標局、生意、田地,有許多浪人把孩子寄留給他,也因此收養為義子女,直到成家。

耆老口中的洪狗昌精通各種語言,更是吃苦耐勞的人,對部落的事總是教導與幫助,大家都很佩服他的才智,可算是當代英雄人物!

文章資訊
文章年度107
文章編號3
文章組別高中
文章語別建和卑南語
族語標題tu pinicauwan i Kawsiyang
漢語標題傳說中的洪狗昌
文章作者洪渟嵐 洪艷玉
漢語摘要