107 年全國語文競賽原住民族語朗讀【建和卑南語】 國小學生組 編號 4 號
puwapuwa mipauwayan da ikavavaaw nu mudadangi

“ inta na cau palru kana minacay, adi ta diya pakalrang mudawilr mudadangi mu, nanta ikavavaaw, iniyan da cima’. ” kema marengay na cau. mudawilr ta mukuwa mudadangiya, pakasaadu data inana’u da ta kiningeran.

nu mudadangi ta muiyaiyan diya karuwa ta puwapuwa pakasayhu pakadawilr da piniangeran.di ini na udadangiyan mu, maruwa ta kadu kanta i Taiwan. di nu kadu ta kana duma kanatar.

nu kadu ta kanta i Tawan mu, maruwa ta mipaliding mukuwa kanta kinasaharan muiyaiyan, harem kananta kanatar mu, kaduwan lra na miinlranan lra micepa kana marengarengay maumalrumalr kanta kana duwa mudadangiya na cau. tu umalray ta peniya kana adi ta menana’u kana valray i savak, di na akanen diya mu, maresayhu kana sinsi na pananadam kana pinidare’an di kana kakuwayan na kinawacanan.

kalra’ayan ta mudadangi kanta kanatar, nu ulra ta diya ipaladuk da ’a’iyar da paysu mu, maruwa ta lra mu iyan. ’inava nu milralrang ta karuwa ta mareilran.

kanini na pida’ami, inta di na Talu mu, karuwa ta lra karamukuwa kivangavanga kantanta kanatar kana wariwari diya, marekaduwan na cau na mudadangi, pakamaresemak lra ini na udadangiyan diya na kiyakarunan, kani makadekalr diya mu, ulra tu kirkamelriyan. na akanen lra, na pinikavangan lra na kinikaduwan lra di na pakakawangan lra, na kasemaangalan lra mu, ulra nantu kirekamelrimelri iyan diya. adi ta parepakuwakuwa data ikavavaawan, kitulud ta kantu kakuwayanan. ta aya’aw melak idu nantu ’inavayan di ta asalraw ta ’ulidan paka’inavaya ta.

ini na udadangiyan mu mau na patakakesi kanta, semalra na temakakesi i rakad mu, nu pulaludus kantu tinakakesiyan mu, mukuwa diya mudadaiya parasan.

mau na kikuwa “ nu temakesikesi ta lra da sadu na valray mu, adi kamawan nu padawilr ta da inlrangan a dalan. ” kema tu pauwayan.

107 年全國語文競賽原住民族語朗讀【建和卑南語】 國小學生組 編號 4 號
旅遊豐富人生

一個人若沒出去旅行過,會被說活得沒有價值。旅行使人增加見聞,開闊視野。

在國內有人自己開車,國內有許多名勝古蹟。經驗豐富的解說員,會介紹在書裡沒讀過的知識,各地的特產,比老師說得還清楚。

在國內旅遊很方便,但最好結伴同行。

這幾年觀光開放,都有旅人前往中國,食衣住行育樂各有特色,不用做比較,可以了解他們的生活方式,吸取他們的優點來改進自己。

旅行也是教育,所以高中畢業前學校會辦一次畢業旅行,正所謂「讀萬卷書,不如行萬里路。」

文章資訊
文章年度107
文章編號4
文章組別國小
文章語別建和卑南語
族語標題puwapuwa mipauwayan da ikavavaaw nu mudadangi
漢語標題旅遊豐富人生
文章作者洪艷玉 洪渟嵐
漢語摘要