106 年全國語文競賽原住民族語朗讀【初鹿卑南語】 高中學生組 編號 2 號
menadanadam temarapinuyumayan saruma’enan

kemay kinaaidanan palru harem. na Pinuyumayan mu, salaw murekes tu niruma’enan. nu kazu a kasangalan lra, a kuwatrengan lra kantu niruma’enan mu, payas muwazuk marepuwalraalrang, marepana’una’u zi marepalrazam zatu ikasaruma’enan.

kazu lra a saruma’enan kani zekalr. tu kiyalikuzay kanantu temamayan mu, payas muwazuk tu niruma’enan. zuwa puwalranga kana wawariwari. palru za piya melingez pasekaz zatu palisiyan. kana maretinuwanuwas lra mu, mazayazayar zantu uparaazukan masalr. nu maretrevutrevung ta zanta ma’iza’izangan mu, ma’ulid ta merengay tu ngai za temuwamuwan zi  ma’ulid ta za eman kema kimazayar. ka’inava nu marayas ta muwazuk temakesi zanta piningaiyan kema tu pinazayazayaran. zi kemuret za nu liyusan lima mu, parasan muwazuk menadanadam temarapiningaiyan. kanizu na vulan mu, kemirakaz temakesi nazu na saruma’enan.

karuwa makavetra’an misama’ tu pinitrauan na zuwa kurelranga. nantu sinsi mu, amau tu ma’izangan na sayhu marengay panadam. musavak na sinsi mu, ulra na “ ina sinsi, ’inavayan! ” kema, ulra na “ mumu sinsi, ’inavayan! ” kema, ulra na ma’ulid za aeman kakuwa marengay mu, kurelrang elra “ mumu sinsi, ’inavayan! ” kema. kasahasahar zi kalikeliked nu mena’u ta.

palrivak temarapinuyumayan kiumalr na sinsi za, i eman nu ngadan kema kiyumalr kana sasasasa. na mingadan za tinarapinuyumayan mu, temuvang. kazu a sasa. “ i Minatray ku ngadan ” kema. “ i Minatray nu ngadan? ” tu kuwayaw kana sinsi mu, “ hai ” kema temuvang. vuri’awan nazu na saruma’enan. na sinsi malrazam kanantu temuwamuwan za mingadan kani Pinazay. zi tu pungadanay kani Pinazay. pamelri nu merarengay zantu ngadan izu na alrak.

na sinsi mu, venavati za vativatiyan, zi tu tililray kanantu kemakezeng.  kurelrang kanizu na tililr miyup papiya. nu sayhu lra miyup mu, tu parevulavulasaw paiyup, zi tu kasayasayayaw palrazam zantu pauwayan. nu eman mu, mutukazuwazuwa menadanadam matuvatuvang.

sazu tu ipanadam kana sinsi. na kakuwayanan lra, na kasangalan lra, na lrehiyan lra zi na senay lra. salaw ra’a’emetran menadanadam nazu na saruma’enan. alra masilutr kemuda mu, salaw sadeku tu ma’izai’zangan.

106 年全國語文競賽原住民族語朗讀【初鹿卑南語】 高中學生組 編號 2 號
家族族語班

自古至今,卑南族人的家族都很團結。如家族有喜慶, 有憂傷時,很快速的聚在一起,互相幫忙,互相關照和互相認識親屬關係。

在部落有一家族,他們的父親往生時,家族們每天來幫忙料理後事,直到所有的祭儀結束。家族臨別聚會時,討論下次聚會的時間。他們感覺到與長輩聚在一起,而無法用族語交談感到遺憾。最好能常常聚在一起練習我們的語言。就這樣決定開辦家族族語班,定在每週五上族語課,也就在當月,這一家族的族語班開始上課了。

要開始上課了,約有20幾個親人參加。他們邀請了會說族語也會教族語的長輩們當老師。他們集合在教室裡,當老師進入教室時,有的說:「ina,老師好!」有的說:「mumu,老師好!」有的不知道要怎麼稱呼,只好跟著說:「mumu,老師好!」看了這情境覺得又有趣又好笑。

老師先問每一個人的族語名字,每人都說出自己的族語名字。其中有一位說: 我名叫Minatray,老師問:「你的名字是死掉嗎 ?」他說:「是的」,大家聽了笑做一團。老師知道他的祖先有名叫Pinadray的,就給他取名叫Minadray,這個孩子會正確的說出自己的名字。漢人沒有卑南族名,老師幫他們找適合的族名。

老師說故事,班長就寫下來,老師一字一句的帶著念,會了就輪流念,之後老師解說每一句每一段的意義,有時兩人一組練習對話,有時還會練習聽寫。 

老師教了很多,有傳統習俗、有歡慶的、有祭儀的、有歌謠的。這一家族很認真的練習,遇到親友會用族語寒暄問候,雖不是很流利,長輩看了覺得很欣慰溫馨。

文章資訊
文章年度106
文章編號2
文章組別高中
文章語別初鹿卑南語
族語標題menadanadam temarapinuyumayan saruma’enan
漢語標題家族族語班
文章作者張阿信、林進星
漢語摘要