106 年全國語文競賽原住民族語朗讀【撒奇萊雅語】 國小學生組 編號 2 號
lalabu nu luma’ aku

saspat ku tademaw nu lalabu nu luma’ aku, ama, ina, kaka atu kaku, u misiwbayay ku ama nu maku, i luma’ay ku ina nu maku, micudaday henay kaku atu kaka nu maku.

kalatawaay a tademaw ku ama nu maku, limulak ku bihid a azihen, manamuh aca pakatawa, pakalimulak tu katuuday. sapahabayaw i tamiyanan, u sakacaayaw ka nayi’ nu kakanen, nayi’ nu caedung, kyu sademiamiad sa mangelu’ maluk, nayi’ aca ku ngaliwngiw. manamuh ciniza mudadiw, masumad nu dadiw niza ku balucu’ nu tademaw. matulin ku paicelang niza i tamiyanan, paseneng kapah kami sa, tengil sa tu pisakamu nu niyam. izaw i tepal ku ama sa, nayi’tu ku katalawan nu maku.

sa’tim sa ku ina midiput i tamiyan, a paayaw tu sakakapah nu uzip nu i luma’ay, nika uyni tu u nikan atu kaylay milatlat tu uzip ku sakakapah nu uzip. u ina satu nayi’ sa ku lawad niza misacalicali tu sapahalhal tu luma’ay a saki nu lanam, lahuk, labi a kawaw, yadah aca ku sasakawawen tu nu luma’ay, tu saka lusimet lamadac tu nu labu nu luma’ niyam, limulak atu kapah ku nieneng. mizateng kaku aci kaka tu payniyay sapiedap tu kawaw nu ina, pipahanhanan sa a lunuk han niyam miedap tu kawaw nu ina, hay masusud ku ngelu’ niza.

kapah ku tinsu nu kaka aku i cacudadan, macucul tu nu cacudadan a milihiza tu madademecay miunduay, nay adidi’ kaku ci kaka ku piazihan tu pinanaman tu nu maku, maydih kaku a mahiza ci kakaan nu maku, tu sapakanamuh ci amaan atu ci inaan.

u sakakapah, dihku, limulak nu lalabu nu luma’ niyam sa, nikangelu’an nu ama atu ina a kinabakahan tu uzip a midiput tamiyan. mikukay kaku ku heniyan na tatusaay a babalaki, sisa cunusen nu maku ku pisaicelang micudad, hinien tawya matatungus tu sapakanamuhaw i tu heniyan.

106 年全國語文競賽原住民族語朗讀【撒奇萊雅語】 國小學生組 編號 2 號
我的家人

我家共有四個人,爸爸、媽媽、哥哥和我,爸爸是個商人,媽媽是家庭主婦,哥哥和我都還是學生。

爸爸臉上總是帶著笑容,也常常說些笑話,逗大家開心。為了養育我們,讓我們不愁吃穿,每天都辛勤的工作,卻從不抱怨。他喜歡唱歌,他的歌聲讓人感覺到溫暖。他常常鼓勵我們,讚美我們,傾聽我們說話。有爸爸在身邊,我覺得什麼都不怕。

媽媽總是細心地照顧著我們,她很注重家人的健康,她說均衡的營養和適當的運動是保持健康最好的方法。媽媽除了要為三餐而奔波辛勞之外,還要做很多家事,讓我們的家永遠保持著乾淨、溫馨和幸福。哥哥和我假日時都會主動幫媽媽做家事,減輕她的負擔。

哥哥在校成績十分優異,也是一位經常代表學校參加比賽的運動健將,從小就是我學習的對象,我希望也能和哥哥一樣,讓爸爸、媽媽引以為傲。

我的家幸福、溫馨、快樂,那是爸爸和媽媽辛勤付出與經營的成果。我感謝我的父母,所以我會更努力做好學生的本份,這樣才是報答他們最好的方法。

文章資訊
文章年度106
文章編號2
文章組別國小
文章語別撒奇萊雅語
族語標題lalabu nu luma’ aku
漢語標題我的家人
文章作者陳玉蘭
漢語摘要