107 年全國語文競賽原住民族語朗讀【撒奇萊雅語】 高中學生組 編號 4 號
sapupu tu hekal

sapupu tu tahek hananay, matenes kaku mudateng. makadateng tu naayaw, itini naidaw ku macebeday kilangkilangan atu lutuk, mamintu malungad patidengan tu sacasacacay sananay matatung duday a luma’ atu kakuliyan. paini nu tahek tu bancalay a hekel atu yadahay a aalan, pabelet han nita mulawpes.

tada malakuyt ku nilungad, palawpes tu nipaini nu tahek tu aalan, sikapeci’ nu langaw i la’ci, malingatu tu pacuay ku tahek. maydih macunus ku kalisiw nu tademaw, misukay mipupu tu hekal. u ibuk nu nanum nu kakuliyan sipabelun i sa’wac, u wacah palangecul sa patahekal, u nu bakah tu sakaudip pacebasa mupadeng, sikauning tu nu bayu, sa’wac, u lala’, u bali inayi’ maliwaliway.

naw tingalawway ku sa’wac maibuk tu waca, malaucep tu ku buting, tu nu lutuk satu tu talakaway, micunus tu ku angtul a sanek. u akuti’ nu la’ci caypiwac ku tademaw patahekal tu sanek takalawtakalaw, malananum tu ku suleda,macunus talakaw tu ku nanum nu bayu, u duma tu amaenep ku ngapan, u kakitidaan nu tademaw atu aadupen adidiwadidiw, masumad tu ku demiad,balad, dadaw nu bayu, kedal, u caledes, sienaw. a iniw tu wamin.

inayi’ ku tanengay a demiad kitidaan,u lala’ atu u hekal nu tahek, amabades tu kita maudip. amisuayaw kita tu nayi’ay ku kakanen, kasumad nu demidad, milaliday a imelang, anu mahini tu, amalawpes ku tademaw atu tuud aadupen, a duut tu amin kanatalay malala’gi.

sakatenes nu hekal, saka bancal nu nikaudip, akaymawen mipupu nu tademaw ku lala’, saetimen ku aalan, pupuwen ku biyaw a lutuk balu kilang atu hekal. sipayni i udip misakawaw, supeden ku nanum, cacay ku tipeluk, cacay ku belac, manapiwac pasubana’en tu kubiyabiyaw a tademaw, anu malaluk kita, acaaytu kya katayni ku salibung han i sadikud.uyniyan a kawaw u kakasakala han sasalabuwen, u sakay kanatalay tu a tademaw. kyu u sapasubana’ nu wina atu wama i wawa sa, a sipasubana’ nu saydan tu micudaday, u pasinbungngay sa a misaicelang patenak, u i kanatalay a tademaw sa, a idaw ku tanektekay a punu’, pisamisiyi tu tu mahiniyay a tadiuc, baluden i tamin ku balucu’ misaicelang, kya amakale ku tu cekak, a liwanen tu ita ku sakapahay a kaudipan nu adiwawa amu eneng i hekal.

 

107 年全國語文競賽原住民族語朗讀【撒奇萊雅語】 高中學生組 編號 4 號
環境保護

幾年前,這片草地和綠色樹林,已被開發成高樓大廈和工廠,優美的環境和豐富的資源,短短幾年內消耗殆盡。

過度開發使地球生態遭到破壞。人類為了利益,忽視環保。污水排入河流、廢氣排入大氣,垃圾隨意棄置,導致海洋、河流、土地、空氣遭到污染。

清澈的河水變濁,魚類消失,瀰漫著令人作嘔的氣味。地球的溫度逐漸升高,陸地將被淹沒,人類和動物生存的空間會越來越小。氣候異常,洪水、海嘯、乾旱、炎熱、酷寒,不斷發生。

沒有合適居住的氣候、土地和環境,生活將變得艱困,若繼續惡化,人類和萬物將會面臨滅絕。

為讓環境永續,愛護土地、珍惜資源,保護身邊的花草樹木和環境,都要從自己做起,節省每一滴水、每一張紙、每一粒米,告訴身邊的人去落實。

父母要教育子女,老師要告訴學生,媒體要發揮宣傳的力量,認真面對問題。地球只有一個,我們要為子孫留下最美好的生存環境。

文章資訊
文章年度107
文章編號4
文章組別高中
文章語別撒奇萊雅語
族語標題sapupu tu hekal
漢語標題環境保護
文章作者督固撒耘
漢語摘要