106 年全國語文競賽原住民族語朗讀【建和卑南語】 國小學生組 編號 2 號
muruma’ kemay kungkuwan

idu na pakalikudan na takakesien mu, parekipiya mi lra, di na adain muruma’ na eman diya mu, niyam parapecaw, na vavalrayan lra, na pakadaalram kana ma’a’idangan na valray adi ta malaalup minada muruma’ mu, adi ta kikaselru. nanta pacavuwan ta adayaw muruma’ lremisaw, nu adi mu, nu ’emanan lralrisaw ta lra kanidu na pacavuwan na ’angliw di kikaselru ta kana sinsi.

muruma’ ta kemay i kungkuwan mu, ulra na cau na awa pusipan. ulra na mukuwa i ancinpan venavalray kanantu vaavalrain di mengangara kanantu ma’idangan da duwa melaka kanintaw, ulra na kurelrang kana vutawke i kungkuwan. marengay i nani kaningku mu, nu kemay kungkuwan u mu, kadadika muruma’ pulralrang mapit kana caker kema. meredek ku i ruma’ mu, payas ku emapiyapit kana caker. kemay pata tuki emciv ku, palru kana ’aremeng nu pituwa tuki nanta inuvalesan adi ta pakaalak da saleman paysu, padangal nu kietan ta da paysu! ’aremeng lra di piya lra demuru temusasiyaw kana keraravien i nani, piya mi lra keravi mu, kinganguwayan ku munimun kana ulra ku vaavalrain. di pavalray ku diya kanidu na pakadaalram kana ma’idangan na valray.

nu iniyan da caker da apiyapiten mu, semavesav ku daku pacavuwan di remames ku kanangku suvung. midap ku diya i pacaran paliwliws. semulev ku mapec kana carangcang lra na kavakavang, di ku paresenesenengaw cemekip. nu kemay kungkuwan ku mu, mavangavang ku di arainiyan ku da wari kivangavang, aymu sadu ku ninadaman kanini na kiyakarunan data kudakudayaw kikarun mu, mutulre’ay. marengay i nani mu, “amana na mawmau sayhu temakesi kamawan kana vuresuk na valray, nu cau ta mu, ta kasayhuwaw na eman diya.” kema.

106 年全國語文競賽原住民族語朗讀【建和卑南語】 國小學生組 編號 2 號
放學回家

最後一節課總算下課了,要帶回家的東西趕快收拾好,作業簿、聯絡簿要記得帶,回到家才不會挨罵。便當盒要帶回家洗,不然明天就要洗臭酸的便當,也會被老師罵。

放學後有的同學要去補習班上課,有的到安親班做功課等爸爸媽媽來接回家,有的參加學校的課業輔導。而我媽媽總是要我放學快點回家幫忙排葉子,一回到家後就開始排荖葉。從四點多排到晚上七八點。天黑了,媽媽也把晚餐做好了,吃飽了我先洗澡再寫功課,完成後還請媽媽檢查並在聯絡簿上簽名。

沒有葉子好排的時候,我要洗自己的便當和襪子,打掃外面四周環境,收納曬乾了的衣服並分類摺好。放學後雖然很忙碌,很少有時間玩,但,從工作中我學到了工作的方法。媽媽說:「不要做只會讀書的書蟲,是人還要學會做事。」

 

 

文章資訊
文章年度106
文章編號2
文章組別國小
文章語別建和卑南語
族語標題muruma’ kemay kungkuwan
漢語標題放學回家
文章作者陳金妹 洪渟嵐 洪艷玉
漢語摘要