106 年全國語文競賽原住民族語朗讀【宜蘭澤敖利泰雅語】 高中學生組 編號 1 號
cmi lungan bnkis

maki sali ta ga kyan kwara mbkis ta, uba ru uya, yaba ru yaya, mama ru yata. kmayan mbkis maha, ita c’oli ga aring ta la’i cikuy lga nyu siy ba’i mosa ta mtana m’bkis kwara. kwara knxan na ita c’oli hani ga, snbin ta nya mbkis ta kwara. nanu yaca ku ungat rnang mbkis lga ungat myasa knxan ita kwara la’i knbahan uyi la. nanu yaca ku ita kwara lla’i Tayal hani ga siga tkba’un ta maha kenu mosa cmi lungan mbkis ta.

te utux ga le’aw ta mlahang he na mbkis ta. aras sali ru bi’an ta myasa ci ’byan, aki ini si tbuci nanak mskinu m’ abi gbyan. le’un ta mema he naha, aki ungat siki ru ilis he naha. ungat g’nux naha lga, le’aw ta pkani nni’un na mbkis, aki ini k’wix he naha, ana tuli ru khani ga aki maki lokah naha.

te sa’ing ga le’aw ta gmalu lungan mbkis ta. baha mcwa lungan na mbkis heya ga yani hayi lungan la’i la, nanu yaca ku ita kwara lla’i ga cikuy ta kmayan ke, iya hmut sma’an kmayan, psya’ay ta lungan mbkis ta, maha ta kya gmalu lungan mbkis ga, mosa m’es calay mbkis ta ru mosa ta nya sbilun kmayan ke knble’an. myasa ke knayan mbkis ta ga mosa myasa knxan kwara lla’i ta knbahan uyi. ya’eh ke snbin kmayan ku mbkis ta ga iyat pble myanux kwara lla’i ta knbahan uyi. 

mbkis na utux sali ta ga, siyan ci ga uba ru uya ta. maha ungat uba ru uya ta ga aki ungat kwara yaba ru yaya ta uyi. nanu yaca ku gleng ci pcyan ta lungan ga uba ru uya ta. myasa ci ga aras sali ru le’i ci mlahang, iya si pci binah nanak sali, maha ta kya lga iyat ta ba’un mlahang ru iyat ta ba’un cmi lungan kwara mbkis ta la. maki utux ryax klhun Yaba Utux Kayal uba ru uya ta lga, yaba ru yaya ta nanak mosa ta le’ un ci cmi lungan mbkis la. baha mcwa ungat yaba ru yaya ta ga ungat kwara ita lla’i uyi. waya ta san kaca cmi lungan mbkis ta ga, babaw nya m’bkis ta lga, mosa ta nya tna’un gmalu kwara lla’i ta uyi.

106 年全國語文競賽原住民族語朗讀【宜蘭澤敖利泰雅語】 高中學生組 編號 1 號
敬老之道

每一個家庭都有老人,祖父祖母、爸爸媽媽、叔伯舅和嬸嬸姨婆。老人說過,所有人從小就都明白,每個人都會漸漸老去。我們每個人的生活,都是由老人建造了再留給後代的。因此,沒有老人的心血就沒有後代子孫的生活。所以所有泰雅族人的後代子孫,都要學習如何做好敬老之道。

首先,我們必須學會如何照顧老人的身體。要接待老人到家裡,為老人準備舒適的床,好讓他們不會受寒受凍地過夜;要把老人的身體洗乾淨,好讓他們的皮膚不會有皮膚病和外傷;老人沒有牙齒的時候,我們要好好準備老人吃的食物,好讓他們的身體不會連站起來和走路的體力都沒有。

其次,我們要好好體貼老人的心。因為老人會慢慢地回歸童心,所以做子女的說話要輕聲,不要任意對老人說重話,要取悅老人的心,用這種方式疼惜老人,老人會很開心並且對我們留下祝福。老人留下祝福的話,我們後代子孫的生活就會蒙福。若老人沒有留下祝福,後代子孫的生活也不會幸福。

一個家庭的老人,最優先的是祖父祖母,因為沒有祖父祖母,就沒有爸爸和媽媽。所以,最優先關心的是我們的祖父祖母。最好是把他們接到家裡照顧,不要讓他們獨自住在別的地方,如此將沒有辦法照料他們,也沒有機會對老人敬孝道。當某天上帝接走了祖父和祖母時,我們要敬孝道的人就是我們的爸爸和媽媽。因為沒有父母親就沒有我們這些子女。我們這樣子對老人善盡孝道時,有一天當我們年老的時候,我們的子女也會同樣如此地關愛我們。

文章資訊
文章年度106
文章編號1
文章組別高中
文章語別宜蘭澤敖利泰雅語
族語標題cmi lungan bnkis
漢語標題敬老之道
文章作者林約道Yuhaw Piho
漢語摘要