106 年全國語文競賽原住民族語朗讀【澤敖利泰雅語】 高中學生組 編號 2 號
ss’ban na binkisan

hata kmkgiy lo! wiy panga kgiy, wiy niya kinhhuway hmakay, giy niya mstazin m’uwas ru giy niya mani tutuh, maras lhbaw inlungan niya kmkgiy ru niya mthelaw balay mmnuka, mtisa, mraws, ’mlsay, su’un mtyaw kwara tetu’iy hani lga blay tminun la. ungat nanu linlungun nku yaki Toyu, niya siy p’uwas tminun latan Tayan, misa sa m’as kwara lla’i niya klatan mintninun ni yaki naha Toyu. ini kbsya ryax hasa lga, niya rema mpanga sku bewak, mit, yapit ru para ku yutas Kenu tehuk sali, ye’igiy lawkah balay musa mtrgyax, ru ba balay mawsa na t’yap ru luyang, mutuw utux rihay wahan nya mta’yux tlnga nya, misu pyux pnanga nya nku ’sinuw rasun nya sali, ru ihiy musa rhkan sya ku yaki Toyu, thkun nya kwara ’sinuw, memaw nya tpihun ru suyun kwara ggluw nya maha, uwah mlaw mani innaras na yutas Kenu.

txan ta ku ba balay tminun latan Tayan yaki muw ru ba balay mllyap ku yutas muw, hani balay minsnbin sku sininlungan binkisan ta mki sku kinyanux alang Tayan. kwara na minnanak stinun ru mtllyap hani ga inkahun sku kinlkahan tmubux ru ggahap binkisan ta, lunga sa niya  mtbwayan kwara nku utux utux kinbahan ta. llungun ku kinbetux kinyanux na nukis ta hani ga, niwan ita na kinbahan Tayan, niya ta ’siy tinblay trhiya sku ss’ban na binkisan ta ru “ git! git! ” maha myuy hani ga, ini ta ba’iy sa pisa wayan su spyalun yeyuwaw la. ini ta llungiy uzi ku kwara hani ga rema niya stbuxan kwara nukis ta, nanu ita ku kinbahan na Tayan ga siki ba’un ta ku hhuway na nukis ta ru siki kba’an ta uzi ku kinngyat ptmubux nku gahap sininlungan Tayan, laxiy ta yengay minsbilan kwara pint’yagun ku nukis ta, nki m’ awyat kinbahan ta ru thuyay sluhing may na rngu kpzing ta uzi. hani lku ’yat ta llaxan balay sku huway ss’ ban na binkisan ta, niya nya spyuy sku kinyanux ta misu ryax soni.

106 年全國語文競賽原住民族語朗讀【澤敖利泰雅語】 高中學生組 編號 2 號
祖先的搖籃

我們去剝苧麻囉一邊背苧麻一邊慢慢的走著,邊跳著唱歌邊抽著菸,帶著愉快的心情去剝麻及敏捷地製麻線、紡線、軔線、理經,歷經這個過程因而就可織布。祖母Toyu毫無煩惱地哼著歌,織著布,因而孩子們都很高興有祖母Toyu織的衣服可以穿。過一會兒,因為祖父Kenu勤於上山放置陷阱,所以早早地就背了山豬、山羊、飛鼠以及山羌回家。他都會在一個禮拜過後就去看所放置的陷阱,而且都會收穫滿滿帶回家中,讓祖母Toyu盡快煮並邀請親戚們與他們一同分享祖父Kenu所帶來的獵物。

這樣看來,祖母的傳統編織以及祖父的狩獵是我們祖先生活的智慧。編織和狩獵的技術都是祖先所種植下來的種子,所以一直留傳到下一代。想到祖先辛苦的生活並種植下來的種子,使我們從小時候就開始享受,像躺在搖籃裡一樣舒服。搖籃的聲音「git~ git~」的擺動著,使我不知做了多少個好夢。在我們還未想到的時候,祖先就已經先幫我們播種了。因此,我們要感謝祖先,更要學習他們的認真,將他們的智慧留在泰雅子孫心裡,並別忘了祖先所留傳下來的技術。當我們得到福氣後,要將這些智慧延續並經營,不忘祖先所給予的搖籃智慧,並且一直擺動在生活中。

文章資訊
文章年度106
文章編號2
文章組別高中
文章語別澤敖利泰雅語
族語標題ss’ban na binkisan
漢語標題祖先的搖籃
文章作者斗睿夏德
漢語摘要