107 年全國語文競賽原住民族語朗讀【德固達雅語】 國小學生組 編號 4 號
Lubuy tqiyan laqi rabu

Rima knkawas mu ma, mmtreru idas knkawas swai mu rseno ka ciida, mapa swai rseno mu ka bubu ma ddesun miyan na neepah ga phmaan ricah hiya. Dehuk neepah de mosa skadi dheran niqan saso qhuni ka bubu mu, ngalan na berah swai mu rseno hayan ma pmexun na yaku ka bubu mu. Kika wada madis keruc mquri btakan lmiqu.

Ini qbsiya de, nii mapa kingal btakan so ba kulo baga bubu mu knthuran na, mosa siyo harac ma, saan na gmeki cenga harac ka puting btakan ma etuk na cida qhuni ka icil, dungan ge, kgahun na pala sneban swai mu rsenu ga, pnguun na ka daha muhing pala, so hari bale sepac papak babuy ka sepac muhing pala kii, mtkugah quri baro pnungu na btakan ga mtdaha pusu hiya ka pala sneban.

Meyah memux swai rseno ka bubu ma psaan na stlubuy cida qhuni truma, bungan na pala bobo na dungan, siicu na tuting rutiq. Kika rngagun ku na bubu mu, uxe beyo mtaqi swai su rseno di, thwai cmikul lubuy tqiyan na swai rseno su nii, mtaqi naq kiya hari denu, sai ncugil mqiri duri.

Kika ga mosa meepah hunac hari ka bubu mu, mangal parih qmulah speriq, ncugil mu qbhangun ga pttebuk parih daha ka btunux “ king! kiyang! ” mesa hmrenang, ririh pgkela yaku bubu mu ga meepah hiya.

Ani betaq saya, ini mu bale chngii ka qtaan mu tmlubuy ttqiyan laqi ka bubu mu, ririh so hari ga knmalu bale nmexan na bubu mu, nii ka srrengo mu riyung ka knkela na bubu mu.

107 年全國語文競賽原住民族語朗讀【德固達雅語】 國小學生組 編號 4 號
嬰孩的吊床

我五歲時,弟弟才六個月大,媽媽經常揹著弟弟,帶著我到梅子園工作。一到耕地,她會找一處有樹蔭的地方,將弟弟放下。然後媽媽帶著鋸子往竹林裡。

沒多久,她扛著一根和她手臂一樣粗的竹子,走到石牆邊,拿起一端竹子插入石牆的隙縫,另一端夾在樹枝幹上,然後將弟弟背袋四角布的邊邊張開,兩角互相打結,好像山豬的四隻腳被綁在竹竿上吊著。

媽媽將弟弟放進吊床裡,用另外一塊布蓋在上方,以防有異物掉進弟弟的身上。接著,媽媽說,弟弟快要睡著了,只要輕推吊床,等一下他就會睡著,你要隨時探望他。

媽媽在我看得到她身影的地方,拿著鋤頭在除草,還不時聽見鋤頭碰到小石頭鏗鏘的聲響,好讓我知道媽媽在工作呢。

即使到今天,我也沒有忘記媽媽將弟弟放進吊床裡,弟弟睡在裡面如同被抱在懷裡一樣溫暖,我很讚佩媽媽的生活智慧。

 

文章資訊
文章年度107
文章編號4
文章組別國小
文章語別德固達雅語
族語標題Lubuy tqiyan laqi rabu
漢語標題嬰孩的吊床
文章作者曾珍美
漢語摘要