107 年全國語文競賽原住民族語朗讀【澤敖利泰雅語】 高中學生組 編號 4 號
rahu ginlyutux

rahu balay ginlyutux na bbinkisan ta atayan. rema naha psr’ xun ku pu’ ing kyanux ta. siga gmlyutux, mhway, mbbay, mklahang, ini k’ usu, ini ks’ ari, ’ngyat mtyaw. ana pp’ umah naha utux utux kayan uzi ga, mutux naha pgaga. siga ini tubux na ga sikin smyatu han, zik na pkluh ga, sikin stsa’ ing, tmasu kwara ku yaw lga, mutux pslkotas la. wiwan sa musa mplmuh sku kwara bbinkisan maha plagaw ta ku oyat na utux kayan wayan, babaw nya ga klhangi sami loziy ru pbhuyaw kwara ku p’ mahan myan ma.

kyala mspat pgan kayan wayan hazi, tehuk alang na tayan ku oyat ru hway na Lyutux Kayan. kahun sku Boksi ini ga Snbu ka mtanah tunux maras sa rahu balay huway na Yesu Kiristo. sikila misan t’ aring muwah ga, ini p’ asi kruma na bbinkis ta. ’si naha ga niya muwah smsyuk sa gaga ru lyutux na bbinkisan ta. ulung sa lokah sintman na pyeng gleng snhi na mntsway, kahun naha sa gmlyutux balay na inlungan ru rmaw pzimu. spwah na Sere Yaba Lyutux Kayan uzi mtyaw, wayan hbayaw ku minxayan ru mkble’ un. nanu ye’ asa ku n_gyut n_gyut sihyun na bbinkis ta maha Lyutux Kayan ku balay balay na lyutux la.

misu sdni lga mki alang ta tayan pyux ku lmlamu na kyokay. siga Tenskyo, Cyoro kyokay, Sinyaso, Sinsyokay. kahun sku knita naha gaga tayan ki sinhyan ga, ini ptna hazi. pengasa tehuk ryax na Pslkotas ga, mutux mhtu uzi ku ini ptna na hngayang.

knita mu nanak hya ga, Yaba Lyutux Kayan ku kinbalay kwara babaw kayan ru babaw rhyan, hiya uzi ku mnay insuna yaba yaya ta. nanu ye’ asa ku musa ta tmubun sku hway na bbinkisan ta ga, musa nya p’ asun uzi. ye’ igi niya nya rema psr’ xun sku mpuw sinrhgan te magan maha, pung kay yaba yaya su ru nble’ iy mlahang, nki simu mtlux myanux babaw rhyan ru ana nanu oyat ga p’ ki ki simu.



 

107 年全國語文競賽原住民族語朗讀【澤敖利泰雅語】 高中學生組 編號 4 號
大愛

泰雅族的祖先已樹立生活的根本。如:愛心、仁慈、分享、守望、不自私、不貪婪、勤奮工作。尚未播種前,會先進行播種祭;割稻前也會先舉行收穫祭;等農事都做完,就進行祖靈祭,這是和祖靈一年一度的相遇,並祈求明年繼續保佑照顧子孫,賜下祝福。

上帝福音傳到泰雅部落,各種宗教對本族文化和宗教信仰有其不同的想法和觀點,一開始,族人並不歡迎,由於,第一代信徒為族人誠心代禱,天父賜生命氣息給天下父母親。當我們對祖靈表現出的感恩思念之意,必然歡喜,漸漸的,族人也開始接受。

文章資訊
文章年度107
文章編號4
文章組別高中
文章語別澤敖利泰雅語
族語標題rahu ginlyutux
漢語標題大愛
文章作者彭秀妹
漢語摘要