106 年全國語文競賽原住民族語朗讀【噶嗎蘭語】 國中學生組 編號 1 號
temuqaz tu naung

ta hibangan qalizaqan niaq saleppawan ay nani temuqaz tu naung, mai tu hibangan mai tu lawad ti tama, ta tangi ay menunu hibangan, pawRat hibangn ngid tuqaz tu pitasaw nituqazan niaq ibabaw ay naung na yangminsan “cisinsan”, yangminsan nani sasaqayan na ta taipakan ay lazat nengi ay sataytaytan semaqsaqay, temuqaz imi saleppawan qaqelisa nani melizaq ti Raingu ti lapusan.

nisanuan ni tama tu tuqazan tu naung maima nengi deddan, wanayka qawqawman mai basaw anem niaq ngid tuqaz tu “cisinsan” naung, aimi saleppawan kinsepat nantungus imi qemaway tu qalizaqan niaq ay qaqanan zanum qapa, zau nani aimi saleppawan temuqaz tu naung qawman mewazing tu saazasan niaq ay Raibang, tina ku situnun, nayau pitasaw pitemawaR sasenipung zaung na yangminsan, pataz lamenumenu melanay na, senulal sukaw saqayan lazan na, semaqay tu kikiya tuqez imi, semaqay tu kikiya tuqez imi temayta tu taqatian sumRuz tepuwaq ay simau uu qeluqut, pulaw, penay, adam pelinglingaw, biyat, naququniay tulis na, semaqay tu kikiya tumqez imi maRaw tu libeng na naung, tatezuma simqenna taytan lepaw nipaluman tu nianiana, saRumzang imi temuqaz tu naung, wanayka azu inengat ti izip niaq, azu masulun tu Rumzang mawalin ti dasam na izip. ta lazanan qalalazan temunuR ti tina tu satawaRan semaqay, timangu ti tina mesuRaw ay.

maseq tu tekituk na naungn nengi ti deddan, maRaw ita pasamedaud zin maqayta ta libeng na naung simqena nianiana, yau qaya kiya lanem siyupan na bali masulun tu bali ta batadan na naung melaziw ta ngayawan maken kitut aita lazat, ta aimi sapeppawan temuqaz tu ibabaw ay tekituk na “cisinsan” maseka tu meqeseR na waway niaq, mai imi sanguyan temuqaz tu tekituk na naung, ta tekituk na naung qeman, maRaw temaytayta, qalizaqan na anem qaya.

temuqaz tu naung niana ’nay mai tu niana, semaRuR tu naung mai pisapatan, semaRuR tu naung siqatatani mesusuRaw ti tina, tuRuzna kawitan na ti ni tama semaRuR, seRay ti tama matebes na ni tina mesuRaw, Raya luzit na, maseq ta libeng na naung, mezukat sikawma nitina muman si qawtu pa uman. 

106 年全國語文競賽原住民族語朗讀【噶嗎蘭語】 國中學生組 編號 1 號
爬山

假日家人最喜歡的是爬山,爸爸不管有多忙,這次的連續假期,要抽空去爬我們每年都會去爬的陽明山最高峰,也是台北市最高峰「七星山」,陽明山是台北人的後花園,爬過一次後我們全家人爬上癮了。

爸爸決定要爬山的日子,天氣雖然不是很理想,但還是澆失不了我們爬上七星山的心,我們一家四口各自揹著自己喜歡吃的乾糧、水、雨衣,這是我們每次爬山必備的物品。媽媽手上還拿著拐杖,這條路並不好走,長年霧濃,陸地濕滑,走走停停的,看看野花或蟲、蝴蝶、蜘蛛、鳥、瓢蟲、(金龜子)、青蛙,有各種顏色,每爬上一小段路,往山下眺望,所看到的風景都有不同的美,每爬上一小段路,就停下來往山下看,雖然爬得滿身大汗,卻感覺身體減輕不少,有一種身體的廢物排掉的感覺。媽媽一路上還提醒我們走路要小心,結果滑倒竟是媽媽。

爬到最高峰時天氣好轉了,遠望可以更清楚的看到山下的風景盡收眼底,還有一點點隨著風的雲,在半山腰從我眼前飄過。人是那麼的渺小,對我們家來說,爬七星山是最具挑戰性,卻也爬不膩的一件事。在山頂上野餐、登高望遠看風景,聽到爸爸媽媽說:「所有工作的疲憊完全沒了,我也感覺真是大快人心。」

上山容易下山難,下山路滑,媽媽一路上跌了又跌,最後是由爸爸牽著下山,連爸爸拉著也跌,跌得滿嚴重,最後還冒出一句話,下次再來。

文章資訊
文章年度106
文章編號1
文章組別國中
文章語別噶嗎蘭語
族語標題temuqaz tu naung
漢語標題爬山
文章作者江素珍
漢語摘要