106 年全國語文競賽原住民族語朗讀【噶嗎蘭語】 國小學生組 編號 2 號
qalizaqan ku ay pasan

qalizaq iku qenuduan ta leppawan ay nani saku, ussa qaqelizaqan qawka iku melizaq, maqezi ta yau ussiq deddan, taytan ku yau ussiq saku qiwat, matutus ti banus na, qaRaynguan temayta naquni ay banus na, yau ta qenawangan na lazan menanum, manna semani ngid iku pazaki qadupas timaizipana, suppaRan na ti ngid iku pazaki, maytis “ miaw ” zin na meqasiR meRaRiw ti, azu semanu tu suka naRin mezaki timaizipana zin na suni na, unay siangatu, manna semani padames ti iku melizaq tu waway na saku, yau kelisa, taytan ku yau ussiq misi ay saku, mezaqis ta bekisian, temayta tu baut ta bekisian, qatawan waway na taytan, azu ngid qawRat tu baut ya  saku, padames ti ku melizaq tu saku, yau kelisa qaya temuqaz iku ta pabaliwan tu tuwami ay tiyaman, ngid qan tu tuwami, ta babaw na qaizuanan semuRut tu kelisiw na tiyam, yau ussiq saku busaR banus na, Raya Rubatang banus na qaya, mata na mamaRaw tu RasuR na tiyam madded ta babaw, madded nani azu niwang, taytan ku melilizaq iku “ wa! wa! Rubatang ye! ” zin ku, mai azu wasu, ta aneman ku saku nani yau tungus na zuma ay waway na mai pisapat.

maken melizaq iku tu saku, wanayka mai tu qaizuanan qemudu tu saku leppaw niaq, yau qaya padames taqa tu dasam tina ku, sabanus saku uu wasu ta tipanan, padames qaqawRiR ti tina ku, mai semulu quduan tu saku uu wasu, maytis tu niz pa banus na saku wasu ya leppaw, Raqana pameng ma iku ta medaudan temayta tu saku.

temuzus tu yau ussiq tasaw lezun, taytan ku yau ussiq azu lukenaw banus na ay saku, ta tanganan na leppaw niaq mamaRaw, azu kemilim tu satalumbian tu sessen, mai iku ngid paRettut timaizipana, satawaR paqanas iku semaqay, matiw sa sammayan mala tu qatis niaq qeman ’si na telaquq, taytan na ta liman ku ’si na telaquq, azu suppaRan na ti anem ku, qawqawman satawaR paqanas mezaki timaikuan qaya, tuRuz na qanan na ti ’si  na telaquq ta liman ku, seppawan ku tu ussiq Raku ta pispisan, mai pa temuqazan tu leppaw, qaqayla ti tuna ku azu suppaRan na kenasianem ku, unay siangatu, yau ti qalizaqan ku ay niquduan pasan “ saku ”.

106 年全國語文競賽原住民族語朗讀【噶嗎蘭語】 國小學生組 編號 2 號
我最喜歡的動物

提到貓,不像狗一樣,會跟人玩在一起,有次,我看見一隻瘦弱,在水溝喝水的貓,不知為何的突然想摸摸牠,牠在察覺我之後,立刻轉身,並發出警告的叫聲,一瞬間,我為這貓的敏捷深深著迷,又有一次,我看見一隻大肥貓,竟然爬上水桶邊緣,打量水桶裡的魚,我又被貓的身手深深吸引,有一次回花蓮外婆家的路上肚子餓了,爸爸帶我們到麵店,一走進麵店在收銀台的高處,看到一隻大白貓,眼睛四處望,坐姿像女王,我高興的說:「哇!好美!」貓是一種自我、獨特、有尊嚴的動物。

我喜歡貓,但家裡不能養貓,媽媽有嚴重的潔癖,非常的反對養貓、狗。

直到一年冬天,我看見有一隻似虎紋的貓在家門口觀望,似乎在找一處避寒的地方,為了不嚇到牠,我輕輕地行走,到廚房拿了一些剩下的雞肉吸引牠,牠看到我手上的雞肉,也感覺到善意,慢慢地接近我,吃了雞肉,我將牠安頓在走廊,放個紙箱避寒,才不會被媽媽挨罵,牠很像知道我的想法。從那時開始我有一隻寵物「貓」。

文章資訊
文章年度106
文章編號2
文章組別國小
文章語別噶嗎蘭語
族語標題qalizaqan ku ay pasan
漢語標題我最喜歡的動物
文章作者江素珍
漢語摘要